राष्ट्रिय तथ्याङ्क कार्यालयले आर्थिक वर्ष २०८२/८३ को प्रादेशिक कुल गार्हस्थ्य उत्पादन (जीडीपी) को प्रारम्भिक अनुमान सार्वजनिक गरेको छ। यस वर्ष बागमती प्रदेशले ५.४० प्रतिशतको आर्थिक वृद्धिदर हासिल गर्नेछ। गण्डकी प्रदेश ५.०१ प्रतिशतको वृद्धिदरसहित दोस्रो स्थानमा रहनेछ। यी दुई प्रदेशको वृद्धिदर राष्ट्रिय औसत ३.८५ प्रतिशतभन्दा बढी हो।
सुदूरपश्चिम प्रदेशले ३.२८ प्रतिशतको वृद्धिदर हासिल गर्ने अपेक्षा गरिएको छ। सबैभन्दा कम आर्थिक वृद्धिदर मधेस प्रदेशको रहने प्रक्षेपण छ। गत वर्ष ४.४३ प्रतिशत रहेको मधेस प्रदेशको आर्थिक वृद्धिदर यस वर्ष १.३१ प्रतिशतमा सीमित हुने अनुमान छ। मधेस प्रदेशको यो गिरावटको मुख्य कारण कृषिको वृद्धिदर ऋणात्मक (–१.२६%) रहनु हो।
