सप्तरीको हनुमाननगर कंकालिनी नगरपालिका-१, भारदहमा धानको बीउ छर्न विद्युतीय मोटरबाट खेतमा पानी तान्ने क्रममा करेन्ट लागेर एक किसानको मृत्यु भएको छ। स्थानीय ४८ वर्षीय सहदेव लौगीको घटनास्थलमै ज्यान गएको छ।
प्रहरी निरीक्षक विजय कार्कीका अनुसार, खेतमा पानी पठाउन मोटरमा तार जडान गर्ने क्रममा लौगीलाई करेन्ट लागेको थियो। इलाका प्रहरी कार्यालय भारदहले घटनाबारे अनुसन्धान गरिरहेको छ।
खेतीको समयमा सप्तरीसहित मधेस प्रदेशमा विद्युतीय मोटर प्रयोग गर्दा किसानको ज्यान जाने घटना बारम्बार हुने गरेका छन्। किसानहरूले यस्ता जोखिम न्यूनीकरणका लागि सरकारको तत्काल ध्यानाकर्षणको माग गरेका छन्।
