सप्तरीको शम्भुनाथ नगरपालिकामा दुई वर्षीया बालिकाको हत्या भएको छ। आइतबार बिहान घरबाट हराएकी बालिकाको शव घरपछाडिको झाडीमा फेला परेको थियो। प्रहरीले घटनामा संलग्न रहेको आशंकामा एक जनालाई पक्राउ गरेको छ।
शम्भुनाथ नगरपालिका–३ निवासी मोहम्मद इरफानकी छोरी खुशी खातुन घरबाट हराएको करिब दुई घण्टापछि मृत भेटिएकी थिइन्। सप्तरी प्रहरीले घटनाको पुष्टि गरेको छ।
सप्तरीका प्रहरी प्रमुख एसपी रूपक खड्काका अनुसार बालिका हराएको सूचना पाएलगत्तै प्रहरीले खोजी कार्य सुरु गरेको थियो। खोजीका क्रममा उनी घर नजिकैको झाडीमा मृत फेला परेकी हुन्।
प्रहरीको प्रारम्भिक अनुसन्धानले घटना व्यक्तिगत रिसइबीका कारण भएको आशंका गरेको छ। एसपी खड्काले घटनामा संलग्न भएको आशंकामा एक व्यक्तिलाई नियन्त्रणमा लिएर अनुसन्धान भइरहेको बताए।
पक्राउ परेका व्यक्तिको विस्तृत विवरण र घटनाको थप सत्यतथ्य अनुसन्धानपछि सार्वजनिक गरिने प्रहरीले जनाएको छ।
