सिरहाको धनगढीमाइ नगरपालिका–१० मा किसानलाई अनुदानमा उपलब्ध गराइएको १३ बोरा युरिया मल अनधिकृत बिक्रीमा बरामद भएको छ। प्रधान किराना पसलबाट प्रहरीले मल नियन्त्रणमा लिएको हो।
जिल्ला प्रशासन कार्यालय सिरहाको संयुक्त अनुगमन टोलीले विशेष सूचनाको आधारमा स्थानीय भरत प्रधानको किराना पसलबाट ३३ केजी दरका १३ बोरा युरिया मल बरामद गरेको हो। टोलीमा सहायक प्रमुख जिल्ला अधिकारी चेतराज बराल, राष्ट्रिय अनुसन्धान विभागका डीएसपी रिजन यादव र कृषि सामग्री कार्यालय लहानका प्रतिनिधि सहभागी थिए।
डीएसपी यादवले किसानका लागि छुट्याइएको अनुदानको मल कालोबजारी गर्ने जोसुकैलाई कानुनअनुसार कारबाही गरिने बताए। धान रोपाइँको समयमा मलको अभाव भइरहेका बेला अनुदानको मल अनधिकृत रूपमा बिक्री भएको पाइएपछि स्थानीय कृषकहरू चिन्तित बनेका छन्।
