सिरहाको गोलबजारमा मोटरसाइकलको ठक्करबाट ७८ वर्षीय कमलबहादुर श्रेष्ठको मृत्यु भएको छ।
बुधबार बिहान करिब ६ बजे गोलबजार नगरपालिका २ स्थित गुरुधाम चोकमा पूर्व–पश्चिम लोकमार्गमा प्रदेश १–०५–००१ प १६३६ नम्बरको मोटरसाइकलले सडक पार गर्दै गरेका गोलबजार नगरपालिका ३ का श्रेष्ठलाई ठक्कर दिएको थियो। कसहाबाट मिर्चैयातर्फ जाँदै गरेको मोटरसाइकलले उनलाई ठक्कर दिएको प्रहरीले जनाएको छ।
दुर्घटनामा घाइते श्रेष्ठलाई लाइफ लङ्ग अस्पतालमा सामान्य उपचारपछि विराटनगर रेफर गरियो। सुनसरीको हरिनगरस्थित सरकारी अस्पतालमा उनलाई मृत घोषणा गरियो।
इलाका प्रहरी कार्यालय गोलबजारले मोटरसाइकल चालक विमल कुमार चौधरीलाई नियन्त्रणमा लिएको छ। घटनाबारे प्रहरीले थप अनुसन्धान गरिरहेको छ।
नेपालमा सवारी दुर्घटनाका कारण दैनिक औसत ६ जनाको मृत्यु हुने गरेको छ। आर्थिक वर्ष २०८०/८१ मा सडक दुर्घटनामा २ हजार ३६९ जनाले ज्यान गुमाएका थिए। सोही अवधिमा २२ हजार ९२७ दुर्घटना भएका थिए, जसमा करिब ५६ प्रतिशत मोटरसाइकल संलग्न थिए।
मधेश प्रदेशमा पछिल्लो ६ महिना (श्रावणदेखि पुससम्म) मा सवारी दुर्घटनामा २९२ जनाको मृत्यु भएको छ। यस अवधिमा २ हजार ८५९ दुर्घटनामा ४ हजार २३८ जना घाइते भएका छन्।
