नेपाल प्रिमियर लिग (एनपीएल) २०२६ अन्तर्गत आज साँझ सुदूरपश्चिम रोयल्स र जनकपुर बोल्ट्सबीच कीर्तिपुरस्थित टीयू अन्तर्राष्ट्रिय क्रिकेट मैदानमा प्रतिस्पर्धा हुँदैछ। प्रतियोगिताको २१औँ खेलका रूपमा यो भिडन्त साँझ ५ बजे सुरु हुनेछ।
अंक तालिकामा तेस्रो स्थानमा रहेको सुदूरपश्चिम रोयल्सले कप्तान दीपेन्द्रसिंह ऐरीको नेतृत्वमा ५ खेलबाट ६ अंक जोडेको छ। टोलीले लुम्बिनी लायन्स र विराटनगर किंग्ससँग हार बेहोरेको छ भने पोखरा एभेन्जर्स, चितवन राइनोज र कर्णाली याक्सलाई पराजित गरेको छ।
यता, कप्तान हर्मीत सिंहको नेतृत्वमा रहेको जनकपुर बोल्ट्स ५ खेलमा ४ अंकसहित पाँचौँ स्थानमा छ। जनकपुरले काठमाडौं गुर्खाज र पोखरा एभेन्जर्सलाई हराएको छ भने कर्णाली याक्स, विराटनगर किंग्स र लुम्बिनी लायन्ससँग पराजित भएको छ।
प्लेअफका लागि अंक तालिकामा सुधारको अवसर
सुदूरपश्चिम रोयल्सका लागि आजको खेल जित्दा अंक तालिकामा आफ्नो स्थान अझ सुदृढ पार्दै प्लेअफ नजिक पुग्ने अवसर हुनेछ। उनीहरूले यस सिजनमा तीन जित हासिल गरिसकेका छन्।
अर्कोतर्फ, जनकपुर बोल्ट्सका लागि प्लेअफको सम्भावना जीवित राख्न आजको खेलमा जित्नैपर्ने दबाब छ। उनीहरूले हालसम्म दुई खेल जितेका छन्।
