नेपाल प्रिमियर लिग (एनपीएल) २०२६ अन्तर्गत कीर्तिपुरस्थित टीयू अन्तर्राष्ट्रिय क्रिकेट मैदानमा भएको खेलमा सुदूरपश्चिम रोयल्सले कर्णाली याक्सलाई ३९ रनले पराजित गरेको छ। कर्णालीका डेभिड मिलरले अविजित रन बनाए पनि टोलीलाई जित दिलाउन सकेनन्।
कर्णाली याक्सले टस जितेर पहिले फिल्डिङ रोजेपछि ब्याटिङमा उत्रिएको सुदूरपश्चिम रोयल्सले निर्धारित २० ओभरमा ६ विकेट गुमाएर १७६ रन बनाएको थियो। सुदूरपश्चिमका लागि सैफ जैबले २४ बलमा ४ चौका र १ छक्कासहित ३५ रनको योगदान दिए। यस्तै, बिनोद भण्डारीले २२ बलमा २ चौका र २ छक्कासहित २७ रन तथा ब्रान्डन मकमुलनले १६ बलमा २ चौका र १ छक्कासहित २४ रन बनाए। कर्णालीका मार्क वाटले ४ ओभरमा २९ रन खर्चेर २ विकेट लिए भने हुसैन तलातले ३ ओभरमा १३ रन दिएर १ विकेट हात पारे।
१७७ रनको विजयी लक्ष्य पछ्याएको कर्णाली याक्स २० ओभरमा ७ विकेट गुमाएर १३७ रनमा समेटियो। कर्णालीका लागि डेभिड मिलरले ५५ बलमा ५ चौका र ७ छक्का प्रहार गर्दै अविजित ९३ रनको शानदार इनिङ खेले। उनले ३८ बलमै आफ्नो अर्धशतक पूरा गरेका थिए। दिपक डुम्रेले १२ बलमा १८ रन बनाए पनि अन्य ब्याट्सम्यानले खासै प्रदर्शन गर्न सकेनन्। सुदूरपश्चिमका स्कट कुगेलीजिनले ४ ओभरमा ३९ रन दिएर २ विकेट लिए भने अनिल खरेलले २ ओभरमा ९ रन खर्चेर १ विकेट हात पारे।
कर्णालीको पावरप्लेमा कमजोर प्रदर्शन
कर्णाली याक्सको सुरुवात निकै कमजोर रह्यो। पावरप्लेको ६ ओभरभित्रै कर्णालीले ३ विकेट गुमाएर मात्र ३५ रन जोडेको थियो। आरिफुल इस्लाम ०.२ ओभरमा शून्य रनमा आउट भए भने मार्क वाट र दिपक डुम्रे पनि सस्तैमा पेभेलियन फर्किएका थिए। यसपछि डेभिड मिलरले एक छेउबाट लगातार रन बनाए पनि अर्को छेउबाट साथ नपाउँदा टोली दबाबमा परेको थियो। सोमपाल कामी र मिलरबीच ३६ रनको सबैभन्दा ठूलो साझेदारी बनेको थियो, जुन जितका लागि पर्याप्त भएन।
यस जितसँगै सुदूरपश्चिम रोयल्स अंक तालिकाको दोस्रो स्थानमा उक्लिएको छ। उसले ५ खेलबाट ६ अंक जोडेको छ। यता, कर्णाली याक्स भने ४ खेलबाट ४ अंकसहित पाँचौँ स्थानमा रहेको छ।
