सप्तरीदेखि बर्दियासम्मका तराई जिल्लामा आगामी तीन दिन तातो हावाको लहर चल्ने सम्भावना छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले बिहीबार सर्वसाधारणलाई आवश्यक सतर्कता अपनाउन आग्रह गर्यो।
जल तथा मौसम विज्ञान विभागको पूर्वानुमानले मधेस र लुम्बिनी प्रदेशका तराई भूभागमा मध्यम स्तरको तातो हावाको लहरको सङ्केत दिएको छ। कोशी, बागमती, गण्डकी र सुदूरपश्चिम प्रदेशका केही तराई क्षेत्रमा ‘हट डेज’ अनुभव हुनेछ।
प्रभावित क्षेत्रमा अधिकतम तापक्रम ३८ डिग्री सेल्सियसभन्दा माथि पुग्न सक्छ। अत्यधिक गर्मीले मानव स्वास्थ्यमा सामान्यदेखि गम्भीर समस्या निम्त्याउन सक्नेछ। प्राधिकरणले यसबाट बच्न विशेष सावधानी अपनाउन अनुरोध गर्यो।
सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, नवलपरासी (पश्चिम), रुपन्देही, कपिलवस्तु, दाङ, बाँके र बर्दिया जिल्लामा उच्च सतर्कता अपनाउनुपर्नेछ। झापा, मोरङ, सुनसरी, चितवन, नवलपरासी (पूर्व), कैलाली र कञ्चनपुरमा पनि मौसमको निगरानी गर्न आग्रह गरिएको छ।
अत्यधिक गर्मीले शरीरको तापक्रम बढ्ने, थकान, कमजोरी, तिर्खा, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशी दुख्ने र बान्ता जस्ता समस्या देखिन सक्छन्।
प्राधिकरणले चर्को घाममा घरबाहिर ननिस्कन सुझाव दियो। बाहिर निस्कँदा छाता वा टाउको छोप्ने सामग्री प्रयोग गर्न भनिएको छ। हल्का रङका खुकुला कपडा लगाउन, प्रशस्त पानी र झोल पदार्थ पिउन तथा ताजा खाना खान सुझाव छ।
खेतबारी तथा बाहिरी काम बिहान वा साँझको चिसो समयमा गर्नुपर्नेछ। बालबालिका र ज्येष्ठ नागरिकको विशेष हेरचाह गर्नुपर्छ। स्वास्थ्य समस्या देखिए नजिकको स्वास्थ्य संस्थामा सम्पर्क गर्न आग्रह गरिएको छ।
शैक्षिक संस्थाहरूलाई आवश्यकतानुसार बिहान वा साँझको समयमा कक्षा सञ्चालन गर्न प्राधिकरणले सुझाव दिएको छ।
