मुगुमा अनुमतिबिना यार्सागुम्बा सङ्कलन गर्न गएका २५ जना पक्राउ

मुगुमा अनुमतिबिना यार्सागुम्बा सङ्कलन गर्न गएका २५ जना पक्राउ परेका छन्। मुगुका विभिन्न पाटन क्षेत्रबाट एक बालिकासहित २५ जनालाई प्रहरीले नियन्त्रणमा लिएको हो। जिल्ला प्रहरी कार्यालय मुगुका प्रहरी नायब उपरीक्षक रविराज थपलियाले उनीहरूलाई अनुमतिबिना वन क्षेत्रमा प्रवेश गरेको आरोपमा पक्राउ गरिएको जानकारी दिए। पक्राउ परेकाहरूलाई जिल्ला प्रहरी कार्यालयमा राखिएको छ। मुगुम कार्मारोङ गाउँपालिकाले यार्सागुम्बा सङ्कलनसम्बन्धी कुनै सूचना प्रकाशित गरेको छैन। सङ्कलनको समय नजिकिँदै गर्दा मुगुका यार्सापाटनमा सुरक्षा बढाइएको छ। प्रहरी नायब उपरीक्षक थपलियाले भने, “अनुमतिबिना पाटन वन क्षेत्रमा प्रवेश गर्ने व्यक्तिलाई नियन्त्रणमा लिएका छौँ, उनीहरूलाई जिल्ला प्रहरी कार्यालयमा ल्याइएको छ।” बहुमूल्य जडीबुटी यार्सागुम्बा सङ्कलनका लागि हुम्ला, जुम्ला, बाजुरा, दैलेख, कालीकोट, अछामसहित मुलुकभर र भारतबाट सङ्कलनकर्ता तथा खरिदकर्ताहरू मुगुका पाटन पुग्ने गरेका छन्। दुर्गमका जनताका लागि यार्सागुम्बा प्रमुख आर्थिक स्रोत हो।