धनुषाका २४ वर्षीय अजयकुमार मुखियाले १ अर्ब ३४ करोड ७८ लाख ३९ हजार १४४ रुपैयाँको अवैध हुन्डी कारोबार गरेको आरोपमा प्रहरीले पक्राउ गरेको छ। केन्द्रीय अनुसन्धान ब्युरो (सीआईबी) र जिल्ला प्रहरी कार्यालय, धनुषाको संयुक्त टोलीले मंगलबार उनलाई धनुषाको शहीदनगर–४ बाट नियन्त्रणमा लिएको हो।
सीआईबीका अनुसार मुखिया मलेसियालगायत विभिन्न मुलुकबाट अवैध हुन्डी कारोबारमा संलग्न रहेको सूचना थियो। सूक्ष्म अनुसन्धान र वित्तीय विश्लेषणपछि व्यक्तिगत तथा व्यावसायिक बैंक खाता प्रयोग गरी उक्त रकमको कारोबार गरेको पुष्टि भएको सीआईबीले जनाएको छ।
मुखियालाई पक्राउ गर्न धनुषा जिल्ला अदालतबाट अनुमति लिइएको थियो। उनीमाथि हुन्डी कारोबारसम्बन्धी कसुरमा थप अनुसन्धान भइरहेको छ।
प्रहरीले यस कारोबारमा संलग्न अन्य व्यक्तिको खोजी तथा अनुसन्धान तीव्र पारेको छ।
