मुख्य सामग्रीमा जानुहोस्
Nmkhabar
EN
एनपीएल लाइभ स्कोर, अंक तालिका र तालिका अंक तालिका ›

कपिलवस्तुका २९ विपन्न परिवारलाई वर्षौंपछि घरमै खानेपानी

कपिलवस्तु नगरपालिका वडा नं. १ राजपुरका २९ अति विपन्न परिवारलाई निःशुल्क खानेपानीको धारा जडान गरिएको छ। वडा कार्यालयले ४ लाख रुपैयाँ लगानी गरी वर्षौंदेखिको खानेपानी समस्या समाधान गरेको छ। अब विपन्न परिवारले न्यूनतम शुल्कमा घरमै सहज रुपमा पानी उपभोग गर्न पाउने भएका छन्।
Nmkhabar डेस्क
१ मिनेट पढाइ
आकार:
Share:
२१७

कपिलवस्तु नगरपालिका वडा नं. १ राजपुरका २९ अति विपन्न परिवारलाई निःशुल्क खानेपानीको धारा जडान गरिएको छ। वर्षौंदेखि खानेपानीको समस्या भोग्दै आएका यी परिवारका लागि वडा कार्यालयले ४ लाख रुपैयाँ लगानी गरेको हो।

सय घर रहेको राजपुर गाउँमा यसअघि एउटै सार्वजनिक धारामा भर पर्नुपर्ने बाध्यता थियो। हुनेखाने केही परिवारले भने व्यक्तिगत खर्चमा धारा जडान गरेका थिए। गाउँमा अधिकांश दलित र अति विपन्न समुदायको बसोबास छ।

वडा अध्यक्ष जाहिद खाँले वर्षौंदेखिको खानेपानी समस्यालाई सम्बोधन गर्न यो परियोजना अघि सारिएको बताए। उनले २८ घरपरिवारमा धारा जडान गरी स्वच्छ र सहज खानेपानीको पहुँच सुनिश्चित गरिएको जानकारी दिए। यो वडामा विगत चार वर्षमा भएका काममध्ये यो सबैभन्दा उत्कृष्ट भएको उनको भनाइ छ।

विज्ञापन

“स्वच्छ खानेपानी पाउनु नागरिकको नैसर्गिक अधिकार हो, सोही अधिकार सुनिश्चित गर्न राजपुरमा धारा जडान गरिएको हो,” अध्यक्ष खाँले भने।

नयाँ धारामार्फत उपभोक्ताले न्यूनतम १ सय १० रुपैयाँ मासिक शुल्क तिरेर १० हजार लिटरसम्म पानी उपभोग गर्न पाउनेछन्। घरमै धारा जडान भएपछि स्थानीय किस्तावती पासी खुशी छिन्। उनले सार्वजनिक धाराबाट पानी ल्याउन हुने सास्ती हटेको र अब घरमै सहज रुपमा पानी उपलब्ध हुने बताएकी छन्। पिउन, नुहाउन, भाँडा माझ्न र कपडा धुनका लागि पानीको समस्या समाधान भएको उनले सुनाइन्।

अर्का स्थानीय विपन्न चिन्का पासीले पनि निःशुल्क धारा जडानले ठूलो समस्या टरेको बताए। “गाउँमा वर्षौंदेखि पानीको समस्या थियो, अहिले वडाले समाधान गरिदिएको छ,” उनले भने।

वडा अध्यक्ष खाँले विपन्नताका कारण धारा जडान गर्न नसक्ने परिवारलाई आगामी दिनमा पनि यस्तै सुविधा निरन्तरता दिइने प्रतिबद्धता व्यक्त गरे। उनले जनताको आधारभूत आवश्यकतालाई प्राथमिकतामा राखेर वडा कार्यालय सधैं जनसेवामा समर्पित रहने बताए।

विज्ञापन
Nmkhabar डेस्क

Nmkhabar डेस्क

संवाददाता · Nmkhabar

Nmkhabar डेस्क Nmkhabar को सम्पादकीय डेस्क हो। यस नाममा प्रकाशित समाचार सरकारी निकाय, अदालत, संसद, नेपाल राष्ट्र बैंक तथा अन्तर्राष्ट्रिय संस्थाका आधिकारिक स्रोत र विश्वसनीय सूचनाका आधारमा तयार गरिन्छन्, र प्रकाशनअघि तथ्य तथा भाषाको सम्पादकीय जाँच गरिन्छ। हाम्रो सम्पादकीय र एआई प्रयोग नीति: https://nmkhabar.com/ai-policy/ । कुनै त्रुटि भेटिएमा info@nmkhabar.com मा जानकारी दिनुहोस्, हामी तुरुन्त सच्याउँछौँ।

थप समाचार