सिरहामा परीक्षाका क्रममा जफत गरिएका ४९६ मोबाइल पानीमा डुबाएर नष्ट गरिएपछि सर्वोच्च अदालतमा रिट दर्ता भएको छ। अधिवक्ता अनिलकुमार साह, पीडित विद्यार्थी र सामाजिक अभियन्ताहरूले संयुक्त रुपमा यो मुद्दा दायर गरेका हुन्।
रिटमा गृहमन्त्रालय, मधेश प्रदेशको शिक्षा तथा संस्कृति मन्त्रालय, राष्ट्रिय परीक्षा बोर्ड र सिरहाका प्रमुख जिल्ला अधिकारीलाई विपक्षी बनाइएको छ। साहका अनुसार, प्रशासनको स्वेच्छाचारी कदमविरुद्ध अधिकारीहरूमाथि विभागीय र फौजदारी कारबाहीको माग छ। पीडित विद्यार्थीलाई क्षतिपूर्ति दिलाउनुपर्ने पनि रिटमा उल्लेख छ।
तीन दिनअघि सिरहामा एसईई र कक्षा १२ को परीक्षाका क्रममा मर्यादा विपरीत मोबाइल लिएर हल छिरेका विद्यार्थीबाट ती ४९६ मोबाइल जफत गरिएको थियो। जिल्ला प्रहरी कार्यालय सिरहाले ती मोबाइल पानीको ड्रममा डुबाएर नष्ट गरेको थियो।
शिक्षामन्त्री सस्मित पोखरेलले मंगलबार सिरहाको घटनालाई गैरकानुनी बताएका थिए। परीक्षाका क्रममा परीक्षार्थीबाट खोसिएका मोबाइल र स्मार्टवाच नष्ट गरिनु कानुनविपरीत भएको उनको भनाइ थियो।
