रास्वपामा आपराधिक पृष्ठभूमि र लागुऔषध मुद्दाका आरोपीको टिकट हत्याउने होडबाजी

राष्ट्रिय स्वतन्त्र पार्टी (रास्वपा) भित्र आगामी चुनावका लागि आपराधिक पृष्ठभूमि, गुण्डागर्दी, बैंकिङ कसुर र लागुऔषध कारोबारमा जोडिएका व्यक्तिहरूले टिकट हत्याउन सक्रियता बढाएको खुलासा भएको छ। ‘शुद्ध सुशासन’ को नारा दिएर उदाएको रास्वपामा यस्ता विवादित पात्रहरूको सक्रियताले राजनीतिक वृत्तमा ठूलो हलचल ल्याएको छ।

पार्टी स्थापनाको छोटो समयमै जनताको विश्वास जितेको रास्वपाको लहरलाई भजाएर आफ्नो आपराधिक छवि लुकाउने र राजनीतिक संरक्षण पाउने दाउमा ठूलो संख्यामा विवादित व्यक्तिहरू सल्बलाएको आरोप छ। स्थानीय तहदेखि प्रतिनिधि सभासम्मका विभिन्न क्षेत्रमा टिकटका लागि दौडधुप गरिरहेका कतिपय व्यक्तिहरू विगतमा गम्भीर आपराधिक कसुर र लागुऔषध ओसारपसारका मुद्दामा मुछिएका वा फरार सूचीमा रहेका छन्।

सप्तरीमा १ क्विन्टल ३० किलो गाँजा काण्ड

भर्खरै मात्र सप्तरीको सुरुङ्गा नगर सभापति मोहम्मद साबिर अली (हुसेन) १ क्विन्टल ३० किलो गाँजा काण्डको पुरानो लागुऔषध मुद्दामा पक्राउ परेका थिए। यो घटनाले रास्वपाको आन्तरिक शुद्धीकरण र उम्मेदवार चयन प्रक्रियामा गम्भीर प्रश्नचिह्न खडा गरेको छ। यसअघि पूर्वसांसद ढाकाकुमार श्रेष्ठ पनि लागुऔषध औषधि बिक्री र अडियो काण्डमा तानिएका थिए। यस्ता शृङ्खलाबद्ध घटनाले पार्टीको ‘परिवर्तन र सुशासन’ को नारामाथि प्रश्न उठेको छ।

आपराधिक कसुर चोख्याउन ‘घण्टी’को सहारा

स्थानीय कार्यकर्ता र आम नागरिकहरूका अनुसार, लागुऔषध, गुण्डागर्दी र वित्तीय ठगीमा संलग्न व्यक्तिहरूले कानुनी कारबाहीबाट बच्न र आफ्नो पुरानो दाग धुन ‘नयाँ शक्ति’को बिल्ला भिरिरहेका छन्। चुनाव नजिकिँदै गर्दा पार्टीभित्र आर्थिक पहुँच र ‘सञ्जाल’का आधारमा टिकट फुत्काउन यस्ता विवादित पात्रहरूले तल्लो तहदेखि माथिल्लो तहसम्म दौडधुप तीव्र बनाएका छन्।

सुशासन र परिवर्तनका लागि अहोरात्र खटेका निष्ठावान् र स्वच्छ छविका कार्यकर्ताहरू भने पैसा र आपराधिक पृष्ठभूमिका मानिसहरूको प्रभाव देखेर चिन्तित बनेका छन्। यो समाचार सार्वजनिक भएसँगै सामाजिक सञ्जालमा नागरिकहरूले रास्वपा नेतृत्वलाई तीव्र प्रश्न गरिरहेका छन्।

मधेस प्रदेशमा रास्वपाको छविमा प्रश्न

सप्तरीको सुरुङ्गा नगर सभापति मोहम्मद साबिर अली (हुसेन) को लागुऔषध मुद्दामा पक्राउ पर्नुले मधेस प्रदेशमा रास्वपाको छविमाथि गम्भीर प्रश्न उठेको छ। मधेस प्रदेशका नागरिकहरूले ‘परिवर्तन’को नारा बोकेको पार्टीमा यस्ता व्यक्तिहरूको संलग्नताले निराशा व्यक्त गरेका छन्। यसले मधेसको राजनीतिमा नयाँ विकल्प खोजिरहेका मतदाताहरूलाई थप अन्योलमा पारेको छ।

सुशासन कि अपराधको संरक्षण?

सर्वसाधारणले आक्रोश व्यक्त गर्दै भनेका छन्, ‘पुराना दलले आपराधिक व्यक्तिलाई संरक्षण दिए भन्दै विकल्प खोजेका जनताले फेरि रास्वपामै त्यही प्रवृत्ति दोहोरिएको देख्नु दुर्भाग्यपूर्ण हो।’ विश्लेषकहरूका अनुसार, यदि पार्टीले प्राथमिक उम्मेदवार चयन (प्राइमरी इलेक्सन) र स्क्रिनिङ प्रक्रियामा कडाइ नगर्ने हो र आपराधिक पृष्ठभूमि भएका तथा लागुऔषध कारोबारमा जोडिएकाहरूलाई टिकट दिने हो भने रास्वपाको ‘परिवर्तन र सुशासन’ को नारा केवल नारामै सीमित हुनेछ।

पार्टी नेतृत्वले यस्ता विवादित र आपराधिक पृष्ठभूमिका व्यक्तिहरूलाई तुरुन्त छानबिन गरी बाहिर निकाल्छ कि उनीहरूलाई नै टिकट दिएर चुनावमा होम्छ, त्यो भने आगामी दिनमा स्पष्ट हुनेछ।