झापामा गत जेठ महिनामा आगलागी, हावाहुरी र वन्यजन्तुको आक्रमणजस्ता विपद्जन्य घटनाबाट रु १० करोडभन्दा बढीको क्षति भएको छ। जिल्ला प्रहरी कार्यालय झापाको तथ्याङ्कअनुसार आगलागीले मात्र रु छ करोड ३९ लाख ४० हजार बराबरको नोक्सानी पुर्याएको छ।
जेठमा जिल्लाभर १५ वटा आगलागीका घटना भएका थिए। ती आगलागीले नागरिकको घरगोठ र धनमाल नष्ट पारेका थिए।
सोही महिनामा आएको ठूलो हावाहुरीले जिल्लामा रु चार करोड सात लाख १६ हजार बराबरको क्षति गरेको छ।
यस अवधिमा जङ्गली जनावरको आक्रमणका आठ वटा घटना भएका छन्। आक्रमणमा एक जनाको मृत्यु भएको छ भने नौ जना घाइते भएका छन्। वन्यजन्तुको आक्रमणबाट रु तीन लाख ७० हजार बराबरको क्षति पुगेको छ।
चट्याङबाट रु एक लाख ३६ हजार ५०० को भौतिक क्षति भएको छ। बाढीपहिरोमा मानवीय क्षति नभए पनि प्रहरीले सात जनाको उद्धार गरेको थियो।
