रणनीतिक महत्त्वको स्ट्रेट अफ हर्मुज पुन: सञ्चालन गर्न इरानले कडा सर्त तेर्साएको छ। इरानको इस्लामिक रिभोलुसनरी गार्ड कर्प्सले जलमार्ग सुचारु गर्न अमेरिकाले लगाएको नौसैनिक नाकाबन्दी हटाउन र युद्धबाट भएको क्षतिको क्षतिपूर्ति दिनुपर्ने माग गरेको छ।
इरानको सर्वोच्च राष्ट्रिय सुरक्षा परिषद्का सचिव मोहम्मद बाघेर जोल्घाद्रले अमेरिकाका लागि ६ बुँदे सर्त सार्वजनिक गरेका छन्। यी सर्तहरूले मध्यपूर्वमा बढ्दो तनावलाई थप जटिल बनाएको छ।
अमेरिकी उपराष्ट्रपति जेडी भान्सले फक्स न्युजसँगको अन्तर्वार्तामा इरानको आणविक र परम्परागत सैन्य क्षमता पूर्ण रूपमा ध्वस्त पारेको दाबी गरेका छन्। उनले इरानले दीर्घकालीन परिवर्तन नगरेमा दबाब कायमै राख्ने चेतावनी दिए। मध्यपूर्वबाट तेल र ग्यासको प्रवाह सुनिश्चित गरी अमेरिकीहरूका लागि ऊर्जाको मूल्य कम राख्नु अमेरिकाको लक्ष्य रहेको उनले स्पष्ट पारे।
युद्धको बढ्दो तनावबीच साउदी अरब, टर्की र पाकिस्तानले मक्कामा ‘संयुक्त रक्षा सम्झौता’ मा हस्ताक्षर गरेका छन्। टर्कीका विदेशमन्त्री हकान फिदानका अनुसार यो रक्षात्मक सम्झौता हो। भविष्यमा इजिप्ट पनि सहभागी हुन सक्ने सम्भावना छ। यो सम्झौता कुनै निश्चित देश विरुद्ध लक्षित नरहेको फिदानले दाबी गरे।
हर्मुज जलसन्धि बन्द रहे पनि ‘ट्याङ्कर ट्र्याकर्स’का अनुसार कम्तीमा ५६ वटा ट्याङ्करहरूले गोप्य रूपमा तेल ओसारपसार गरिरहेका छन्। यी ट्याङ्करहरूले अरब देशहरूको तेल निर्यातलाई निरन्तरता दिन खाडी क्षेत्रमा तेल स्थानान्तरण गरिरहेको बताइएको छ।
युद्ध लम्बिँदै जाँदा अमेरिकी रक्षा मन्त्रालय (पेन्टागन) ले कम लागतका स्वायत्त हतियारहरूमा जोड दिन थालेको छ। पेन्टागनका अधिकारीहरूले हतियार अभावका रिपोर्टहरूलाई अस्वीकार गर्दै अमेरिकाको सुरक्षा भण्डार पर्याप्त रहेको दाबी गरेका छन्।
