सूचना तथा सञ्चारमन्त्री डा. विक्रम तिमिल्सिनाले नुवाकोटको पहिरो प्रभावित क्षेत्रको स्थलगत निरीक्षण गरेका छन्। उनले सूर्यगढी गाउँपालिका–२ चोकदेका राम्चे भिर, रातामाटे र पहरेथोका पहिरो प्रभावित क्षेत्रको अवलोकन गरे। सडकमा पहिरो खस्दा जोखिममा परेका बस्तीबारे उनले स्थानीयवासी र अधिकारीसँग जानकारी लिए।
विशेषगरी राम्चे र रातामाटे क्षेत्रका पहरेथोक, फट्पुरलगायतका बस्ती पहिरोको उच्च जोखिममा छन्। मन्त्री तिमिल्सिनाले भूगर्भविद्, जनप्रतिनिधि र स्थानीय अधिकारीसँग पहिरोको अवस्था, त्यसको प्रभाव र सुरक्षा उपायबारे छलफल गरे।
मन्त्री तिमिल्सिनाले जोखिमयुक्त बस्तीको पहिचान गरी सुरक्षित स्थानमा स्थानान्तरण गर्न समन्वय आवश्यक रहेको बताए। उनले विपद् जोखिम न्यूनीकरणमा स्थानीय तहको भूमिका महत्वपूर्ण हुने उल्लेख गरे। प्रभावित परिवारलाई सुरक्षित आश्रय, राहत र पुनःस्थापनामा स्थानीय तह र जिल्ला प्रशासन कार्यालयले अग्रसरता लिनुपर्ने उनको भनाइ थियो।
“विपद् आएपछि उद्धार र राहतमा मात्र सीमित हुनुहुन्न,” मन्त्री तिमिल्सिनाले भने, “जोखिमको पहिचान गरी नागरिकको ज्यान र सम्पत्तिको सुरक्षा हुने गरी बस्ती व्यवस्थापन गर्नुपर्छ।” उनले जोखिमयुक्त बस्ती सार्न सम्बन्धित निकायबीच समन्वय गरेर पहल गरिने प्रतिबद्धता जनाए।
मन्त्री तिमिल्सिनाले जोखिममा रहेका सबै परिवारलाई तत्काल अस्थायी आवासको व्यवस्था गर्न निर्देशन दिए। अस्थायी टहरा वा टेन्ट नभएका परिवारलाई समेत तत्काल आवश्यक व्यवस्था मिलाउन उनले आग्रह गरे।
पहिरो खसेका स्थानमाथिबाट ढुङ्गा खस्ने जोखिम रहेकाले नागरिकको आवतजावत सुरक्षित बनाउन र सडकको पहिरो तत्काल पन्छाउन पनि उनले सम्बन्धित निकायलाई निर्देशन दिए।
