भ्रष्टाचार निवारण ऐन, २०५९ को दफा ८ को उपदफा (१) बमोजिम मालपोत कार्यालय भैरहवा, रुपन्देहीका तत्कालीन प्रमुख मालपोत अधिकृत कुमार आचार्यसहित पाँच जनाविरुद्ध अख्तियार दुरुपयोग अनुसन्धान आयोगले रु चार करोड ५३ लाख ४१ हजार ८०० बिगो कायम गरी विशेष अदालत काठमाडौँमा मुद्दा दायर गरेको छ ।
आयोगले तत्कालीन प्रमुख मालपोत अधिकृत आचार्य, तत्कालीन नायब सुब्बाद्वय लक्ष्मणप्रसाद न्यौपाने, अजितकुमार साहनी (चाई), तत्कालीन खरिदार मेघबहादुर भुजेल मगर र जग्गाधनी पर्वतराजकान्त मिश्रविरुद्ध गैरकानुनी लाभ वा हानि, गलत लिखत एवं सरकारी कागजात सच्च्याई भ्रष्टाचार गरेको आरोप लगाएको छ ।
अख्तियारका प्रवक्ता सुरेश न्यौपानेले सोही ऐनको उपदफा (१) बमोजिम कैद तथा बिगोबमोजिम जरिवानाको मागदाबीसहित आरोपपत्र दायर गरिएको जानकारी दिए ।
