फेवातालमा भारतीय नम्बर प्लेटको कार खस्दा २ जना भारतीय नागरिकको मृत्यु भएको छ। २ जनाको उद्धार गरिएको छ। शुक्रबार बिहान ४:५० बजे सेदीबाट लेकसाइड आउँदै गरेको भारतीय नम्बर बीआर ०५ ६७५९ को कार गैरीचौतारा नजिक दुर्घटना भएको कास्की प्रहरीले जनाएको छ।
गैरीचौताराको घुम्तीबाट कार २० मिटर तल तालमा खस्दा भारतको बिहारका २६ वर्षीय नवदीप कुमार यादव र अर्का अन्दाजी ४०–४५ वर्षीय पुरुषको मृत्यु भएको हो। सशस्त्र प्रहरीको गोताखोर टोलीले तालको २० फिट गहिराईबाट दुईजनालाई अचेत अवस्थामा फेला पारेको थियो।
उद्धार गरिएका २७ वर्षीय अनमोल कुमार यादव र ३३ वर्षीय सुरज यादवको अवस्था मध्यम छ। उनीहरूको गण्डकी मेडिकल कलेजमा उपचार भइरहेको छ। बिहान ६:२० बजे क्रेनले कारलाई तालबाट बाहिर निकालिएको छ।
