कोशी, बागमती, गण्डकी र लुम्बिनी प्रदेशका पहाडी भूभागमा आज भारीदेखि धेरै भारी वर्षाको सम्भावना छ। मनसुनी वायुको साथै बङ्गालको खाडीको गहिरो न्यून चापीय क्षेत्रको प्रभावले देशभर वर्षाको क्रम जारी रहने मौसम पूर्वानुमान महाशाखाले जनाएको छ।
यसैबीच, शिक्षा तथा खेलकुद मन्त्रालयले सम्भावित विपद्लाई मध्यनजर गर्दै विद्यालयहरूमा असोज ८ र ९ गते बिदा दिन र सञ्चालन भइरहेका परीक्षा स्थगित गर्न आग्रह गरेको छ। मन्त्रालयले बुधबार सार्वजनिक सूचना जारी गर्दै शिक्षण संस्थाहरूलाई उच्च सतर्कतामा रहन निर्देशन दिएको हो।
जल तथा मौसम विज्ञान विभाग, राष्ट्रिय विपद् जोखिम न्यूनीकरण तथा व्यवस्थापन प्राधिकरण र विज्ञहरूको पूर्वानुमानअनुसार असोज ९, १० र ११ गते देशभर मेघगर्जन, चट्याङ र हावाहुरीसहित भारीदेखि अति भारी वर्षा हुने सम्भावना छ। उच्च पहाडी तथा हिमाली भू-भागमा हिमपात र तल्लो भेगमा बाढी, पहिरो, डुबान तथा नदी कटानको जोखिम औंल्याइएको छ। प्रतिकूल मौसमले सडक, विद्युत् र सञ्चार सेवासमेत प्रभावित हुन सक्ने अनुमान गरिएको छ।
विद्यार्थी, शिक्षक तथा कर्मचारीको सुरक्षालाई ध्यानमा राखी असोज ८ र ९ गते स्थानीय तहसँगको समन्वयमा आवश्यकताअनुसार विद्यालय बिदा दिन अनुरोध गरिएको छ। सबै विश्वविद्यालय तथा परीक्षा सञ्चालन गर्ने निकायहरूलाई असोज ९ देखि ११ गतेसम्म तोकिएका परीक्षाहरू स्थगित गर्न भनिएको छ।
मन्त्रालयका प्रवक्ता एवम् सहसचिव श्रीप्रसाद भट्टराईले सम्भावित जोखिम न्यूनीकरण गर्न सम्पूर्ण विश्वविद्यालय, शिक्षालय, विद्यालय, स्थानीय तह, शिक्षक तथा अभिभावकहरूलाई समन्वयात्मक भूमिका निर्वाह गर्न आग्रह गरेका छन्।
महाशाखाका अनुसार, आज दिउँसो र राति कोशी, मधेस, बागमती, गण्डकी र लुम्बिनी प्रदेशका अधिकांश भूभागमा बादल लाग्नेछ। हिमाली र पहाडी क्षेत्रमा चट्याङसहित मध्यम वर्षाको सम्भावना छ। तराई भूभागमा पनि सोहीअनुसारको वर्षा र हावाहुरीको सम्भावना छ। कोशी, बागमती, गण्डकी र लुम्बिनी प्रदेशका थोरै स्थानमा भारी वर्षाको सम्भावना छ।
