सप्तकोशी नदीमा पानीको बहाव बढेपछि कोशी ब्यारेजका ४३ ढोका खोलिएका छन्। शनिबार बिहान ६ बजे प्रतिसेकेन्ड ३ लाख १६ हजार ७ सय ९५ क्युसेक पानी बगेको छ। जलसतह निकै माथि पुगेपछि ४३ ढोका खोलिएको हो।
यसअघि शुक्रबार पानीको बहाव बढेसँगै क्रमशः २५, ३०, र ३१ वटा ढोका खोलिएको थियो। शुक्रबार बिहान १० बजे प्रतिसेकेन्ड एक लाख ९८ हजार २ सय २० क्युसेक पानी बग्दा २५ ढोका खोलिए। दिउँसो १ बजे दुई लाख २९ हजार ९ सय ६० क्युसेक पुगेपछि ३० ढोका खोलियो। दिउँसो २ बजे दुई लाख ४० हजार ५ सय ५५ क्युसेक पुगेपछि ३१ ढोका खोलिएको थियो।
कोशी ब्यारेजमा ५२ मूल ढोका र चार नहर गरी जम्मा ५६ ढोका छन्। पानीको बहाव बढेपछि जोखिमको सङ्केतस्वरूप पश्चिमतर्फ रातो बत्ती बाल्ने गरिन्छ।
जिल्ला प्रशासन कार्यालयले सप्तकोशी आसपासका बासिन्दालाई सतर्क रहन आग्रह गरेको छ। तटीय क्षेत्रका नागरिकलाई सुरक्षित स्थानमा जान र नदीमा माछा मार्ने वा दाउरा सङ्कलन नगर्न निर्देशन दिइएको छ। वर्षा जारी रहेकाले नदीमा पानीको बहाव निरन्तर बढिरहेको छ।
