नारायणी नदीको जलसतह खतरा तहभन्दा माथि पुगेपछि चितवन र नवलपरासीका नदी आसपासका होचा तथा डुबान सम्भावित क्षेत्रमा बाढीको उच्च जोखिम बढेको छ। बाढी पूर्वानुमान महाशाखाले आइतबार बिहान विशेष बुलेटिन जारी गर्दै तटीय बासिन्दालाई उच्च सतर्कता अपनाउन आग्रह गरेको छ।
जल तथा ऊर्जा आयोगको सचिवालयअन्तर्गत जल विज्ञान तथा जलस्रोत अनुसन्धान केन्द्र, बाढी पूर्वानुमान महाशाखाका अनुसार आइतबार बिहान ७:४५ बजे नारायणी नदीको जलसतह खतरा तह (९.० मिटर) भन्दा माथि करिब ११.० मिटर पुगेको छ। जलसतह अझै बढ्दो क्रममा छ। देवघाट बाढी मापन केन्द्रमा आज दिउँसोसम्म जलसतह करिब १३.० मिटर पुग्न सक्ने अनुमान छ। उच्चतम जलसतह आज बिहान ११ बजे आसपास देखिने सम्भावना छ। आज साँझसम्म पनि नारायणीको जलसतह खतरा तहभन्दा माथि रहने सम्भावना उच्च छ।
नारायणीका प्रमुख सहायक नदीहरूमध्ये कालीगण्डकीको बहाव खतरा तहभन्दा उल्लेख्य रूपमा माथि पुगेको छ। सेती, मादी, मर्स्याङ्दी, दरौंदी र चेपे नदीमा बहाव सतर्कता तहभन्दा माथि र बढ्दो क्रममा छ। बुढीगण्डकी र त्रिशूली नदीमा समेत बहाव सतर्कता तह नजिक पुगेको र बढ्दो क्रममा रहेको महाशाखाले जनाएको छ।
उच्च बहावका कारण चितवन र नवलपरासीका नारायणी नदी आसपासका होचा तथा डुबान सम्भावित क्षेत्रमा बाढीको जोखिम उच्च छ। नदी तटीय क्षेत्र, नदी किनार, तल्लो भूभाग तथा कमजोर तटबन्ध वा संरचना भएका स्थानमा विशेष सावधानी अपनाउन महाशाखाले आग्रह गरेको छ।
महाशाखाले नारायणी आसपासका होचा तथा डुबान सम्भावित क्षेत्रमा रहेका नागरिकलाई तत्काल सुरक्षित तथा अग्लो स्थानतर्फ जान वा स्थानान्तरण हुन अनुरोध गरेको छ। नारायणी तथा यसका सहायक नदीको तटीय क्षेत्रमा आवतजावत नगर्न, नदी किनार, पुल, तटबन्ध तथा जोखिमयुक्त स्थानमा अनावश्यक भीड नगर्न आग्रह गरिएको छ। कालीगण्डकी, सेती, मादी, मर्स्याङ्दी, दरौंदी, चेपे, बुढीगण्डकी र त्रिशूली नदी तथा तिनका शाखा खोलानालामा समेत आज साँझसम्म उच्च सतर्कता अपनाउन भनिएको छ।
स्थानीय प्रशासन, सुरक्षा निकाय तथा सम्बन्धित निकायबाट जारी हुने निर्देशन र बाढीसम्बन्धी सूचनाको पूर्ण रूपमा पालना गर्न महाशाखाले आग्रह गरेको छ।
