वडा दसैं नजिकिएसँगै काठमाडौंको गोंगबुस्थित नयाँ बसपार्कमा घर फर्किने यात्रुको चहलपहल बढेको छ। आज असोज २३ गतेदेखि अग्रिम टिकट बुकिङ खुलेसँगै बिहानैदेखि यात्रुको भीड लागेको हो।
काठमाडौं उपत्यकाबाट दसैं मनाउन आफ्नो घर फर्किने यात्रुहरू अग्रिम टिकट लिन नयाँ बसपार्क पुग्न थालेका छन्। चाडपर्वका बेला यात्रुको चाप बढ्ने भएकाले समयमै टिकट लिएर यात्रा सुनिश्चित गर्न सर्वसाधारण अग्रिम बुकिङका लागि बसपार्क पुगेका हुन्।
नेपाल यातायात व्यवसायी राष्ट्रिय महासंघले तोकिएकोभन्दा बढी भाडा नलिन आग्रह गरेको छ। बढी भाडा लिएमा कारबाही गरिने महासंघका महासचिव डेकनाथ गौतमले बताएका छन्।
अग्रिम टिकट बुकिङ काउन्टरमा खटिने कर्मचारीले तोकिएको पोसाक र परिचयपत्र अनिवार्य लगाउनुपर्नेछ। यात्रुसँग नम्र व्यवहार गर्दै सहज रूपमा टिकट उपलब्ध गराई सुरक्षित यात्राको सुनिश्चितता गर्नुपर्ने महासंघले जनाएको छ।
काठमाडौं उपत्यका ट्राफिक प्रहरी कार्यालयका अनुसार, यात्रुको चाप बढ्ने भएकाले काठमाडौं उपत्यकाका विभिन्न १४ स्थानमा यात्रु सहायता कक्ष सञ्चालनमा ल्याइएको छ। अग्रिम टिकट बुकिङ खुला भएसँगै चाडपर्वको अवधिभर देशभरका सवारी साधनका लागि रुट परमिट आवश्यक पर्ने छैन।
दसैंको भीडलाई व्यवस्थापन गर्दै असोज २५ गते घटस्थापनादेखि कात्तिक ८ गतेसम्म नारायणगढ-काठमाडौं सडकखण्डमा ट्रेलर लगायत ठूला सवारीसाधन सञ्चालनमा रोक लगाइनेछ। खाद्यान्न, औषधि, इन्धन र दूध जस्ता अत्यावश्यक सामग्री बोकेका गाडीहरूलाई भने यो रोक लागू हुने छैन।
यस वर्ष मधेश प्रदेशमा सार्वजनिक तथा भाडाका विद्युतीय सवारी साधनलाई ५० प्रतिशत कर छुट दिने व्यवस्था गरिएको छ। मधेश प्रदेश सरकारले आर्थिक ऐन, २०८३ मार्फत सवारी साधनको वार्षिक कर, दर्ता दस्तुर, नामसारी तथा नवीकरण शुल्कमा नयाँ व्यवस्था लागू गरेको छ।
यसअघि: दशैँमा बढी भाडा लिनेलाई कारबाही गर्ने यातायात व्यवसायी महासङ्घको चेतावनी
