नेपाली कांग्रेसको १५औँ महाधिवेशनबाट गगन थापा पार्टी सभापतिमा भारी मतान्तरसहित निर्वाचित भएका छन्। उनले प्रतिस्पर्धी श्यामकृष्ण खड्गीलाई ६ हजार २०९ मतले पछि पार्दै पार्टीको नेतृत्व सम्हाल्ने जिम्मेवारी पाएका हुन्।
शुक्रबार राति काठमाडौंस्थित राष्ट्रिय सभागृहमा भएको निर्वाचनको मतगणना सम्पन्न भएपछि महाधिवेशनको मिडिया सेन्टरका सदस्य महेश गौतमले थापा सभापतिमा निर्वाचित भएको जानकारी दिए। अन्तिम मतपरिणामअनुसार, थापाले ६ हजार ५८४ मत प्राप्त गर्दा खड्गीले ३७५ मत पाए। निर्वाचनमा ५४ मत बदर भएको थियो।
कुल ७ हजार ३१७ महाधिवेशन प्रतिनिधिमध्ये ७ हजार ३९ जनाले मतदान गरेका थिए। कुल खसेको मतका आधारमा थापाले ९३.८८ प्रतिशत मत प्राप्त गरे। खड्गीले ५.३५ प्रतिशत मत पाउँदा ०.७७ प्रतिशत मत बदर भयो।
थापाको ३५ वर्षे राजनीतिक विरासत
गगन थापाले आगामी चार वर्ष नेपाली कांग्रेसको नेतृत्व सम्हाल्ने मौका पाएका छन्। विद्यार्थी राजनीतिबाट स्थापित थापा सक्रिय राजनीतिमा लागेको ३५ वर्षपछि नेपालको सबैभन्दा पुरानो पार्टीको नेतृत्वमा पुगेका हुन्।
२०४६ सालको जनआन्दोलनताका वनस्थली स्कुलमा कक्षा ९ मा पढिरहेका थापाले बाल कांग्रेसको क्रियाशील सदस्यता लिएका थिए। क्याम्पस पढ्न थालेपछि उनी कांग्रेसको भ्रातृ संस्था नेपाल विद्यार्थी (नेविसंघ)को राजनीतिमा सक्रिय भए।
थापा २०५१ सालमा त्रिचन्द्र स्वतन्त्र विद्यार्थी युनियनको सदस्यमा निर्वाचित भए। त्यसपछि २०५३ मा त्रिचन्द्र स्ववियुमा सचिव र २०५५ मा स्ववियु सभापति भए। नेविसंघको राजनीतिमा उनले छलाङ मार्दै २०५७ मा उपसभापति र २०५९ मा महामन्त्री बने। तत्कालीन राजा ज्ञानेन्द्रले निर्वाचित सरकार अपदस्त गरी शासन सत्ता हातमा लिएका बेला दुई वर्ष थापाले नेविसंघको महामन्त्री भएर काम गरे।
पहिलो संविधानसभा चुनावमा समानुपातिक सभासद बनेका थापा दोस्रो संविधान सभाको निर्वाचनमा काठमाडौं–४ बाट निर्वाचित भए। सोही समयमा कृषि तथा जलस्रोत समितिको सभापति बनेका उनी पुष्पकमल दाहाल ‘प्रचण्ड’ २०७३ मा प्रधानमन्त्री हुँदा स्वास्थ्यमन्त्री बनेका थिए।
२०७४ को चुनावमा तत्कालीन वाम गठबन्धन (एमाले–माओवादी)को लहर आउँदा पनि उनी काठमाडौँ–४ बाट निर्वाचित भएका थिए। २०६७ मा भएको कांग्रेसको १२ औँ महाधिवेशनमा लोकप्रिय मत पाएर केन्द्रीय सदस्य बनेका थापा २०७२ मा भएको १३ औँ महाधिवेशनमा महामन्त्रीका लागि मैदानमा उत्रिएका थिए। तत्कालीन कृष्णप्रसाद सिटौला प्यानलबाट महामन्त्रीमा उठेका उनी तेस्रो भएका थिए। २०७८ मा भएको १४ औँ महाधिवेशनमा तत्कालीन शेखर कोइराला प्यानलबाट महामन्त्रीको उम्मेदवार बनेर मैदानमा उत्रिएका थापा दुई तिहाइ मतसहित विजयी भएका थिए।
अन्य पदको मतगणना जारी
सभापति पदको मतगणना सकिए पनि अन्य पदका मतपेटिका कांग्रेसको केन्द्रीय कार्यालय सानेपा लगिएको छ। अन्य पदको मतगणना दिउँसोबाट सुरु गरिने बताइएको छ।
यसअघि: नेपाली कांग्रेस महाधिवेशनमा ७०३९ मत खस्यो, मतदान सम्पन्न
