नेपाल संवत् ११४७ को नयाँ वर्ष मंगलबार देशभर परम्परागत भेषभूषा, र्याली, बाजागाजा, सांस्कृतिक झाँकी र म्ह: पूजासहित मनाइएको छ। यस अवसरमा विभिन्न स्थानमा सांस्कृतिक कार्यक्रम र शुभकामना आदानप्रदान गरियो।
नयाँ वर्षको अवसरमा शंखधर साख्वाको सम्झनामा माल्यार्पणसहितका कार्यक्रम आयोजना गरिएका थिए। काठमाडौं, ललितपुर, भक्तपुर, बनेपा, धुलिखेल, बाह्रबिसे तथा दोलखाको भीमेश्वरलगायत नेवार समुदायको बाहुल्यता रहेका स्थानमा विशेष रौनक देखियो।
पृष्ठभूमि
- शंखधर साख्वाले वि.सं. ९३७ (ई.सं. ८८०) मा गरिब जनताको ऋणमोचन गरी नेपाल संवत् सुरु गराउनुभएको इतिहास छ।
- नेपाल सरकारले वि.सं. २०५६ मंसिर २ गते शंखधर साख्वालाई राष्ट्रिय विभूति घोषणा गरेको थियो।
- वि.सं. २००७ मा प्रजातन्त्र स्थापना भएदेखि नै नेपाल संवत्लाई राष्ट्रिय मान्यता दिलाउन अभियान सञ्चालन हुँदै आएको छ।
- वि.सं. २०६५ सालमा पुष्पकमल दाहालको नेतृत्वमा रहेको सरकारले नेपाल संवत्लाई 'राष्ट्रिय संवत्'का रूपमा मान्यता दिने ऐतिहासिक घोषणा गरेको थियो।
म्याग्दीको बेनीमा नेपाल भाषा मंकाःखलः म्याग्दीको आयोजनामा नेवार समुदायको सांस्कृतिक झाँकीसहित प्रभातफेरी निकालियो। बेनीको संगमचोकबाट सुरु भएको प्रभातफेरीमा नेवार समुदायका महिला, पुरुष, बालबालिका र किशोरहरू मौलिक पोसाकमा सजिएर सहभागी भएका थिए। प्रभातफेरी बजार परिक्रमा गरेपछि मंकाःखलको सभाहलमा शुभकामना आदानप्रदान कार्यक्रम गरियो।
सो कार्यक्रममा बेनी नगरपालिकाका प्रमुख सुरत केसीले नेपाल संवत् नेपालीहरूको मौलिकतासँग जोडिएको र यसलाई सबैको साझा पर्वका रूपमा मनाउनुपर्ने विचार व्यक्त गरे। नेपाल भाषाःमंकाःखलः म्याग्दीका अध्यक्ष कृष्णप्रसाद श्रेष्ठले मौलिक संस्कृतिको संरक्षण तथा प्रवद्र्धनका लागि यस्ता कार्यक्रम आयोजना गरिएको बताए।
नेपाल संवत् ११४७ को शुभारम्भका अवसरमा राष्ट्रपति रामचन्द्र पौडेलले शुभकामना सन्देश जारी गर्दै शंखधर साख्वाको योगदानको स्मरण गरे। प्रधानमन्त्री बालेन शाहले पनि स्वदेश तथा विदेशमा रहेका नेपालीहरूलाई शुभकामना व्यक्त गरेका छन्। यस्तै, उपराष्ट्रपति, नेकपा माओवादी केन्द्रका अध्यक्ष पुष्पकमल दाहाल, राष्ट्रिय स्वतन्त्र पार्टीका अध्यक्ष रवि लामिछाने, नेपाली कांग्रेसका सभापति गगन थापा र सभामुख अर्यालले पनि शुभकामना दिएका छन्।
नेपालभाषा मंकाः खलः यलले नेपाल संवत् ११४७ को अवसरमा साताव्यापी विविध कार्यक्रम आयोजना गर्ने भएको छ। न्हूदँ समारोह समितिले बुद्धिचाल प्रतियोगिता, राष्ट्रव्यापी खुला १० किलोमिटर दौड र ३० किलोमिटर साइकल र्यालीलगायतका सांस्कृतिक तथा सामाजिक कार्यक्रम सञ्चालन गर्ने जनाएको छ। कार्यक्रमअनुसार कात्तिक १८ र १९ गते बुद्धिचाल प्रतियोगिता, कात्तिक २३ गते राष्ट्रव्यापी खुला १० किलोमिटर दौड तथा कात्तिक २४ गते ३० किलोमिटर साइकल र्याली आयोजना हुनेछ।
