विश्व स्वास्थ्य संगठन (डब्लूएचओ) ले प्रजातान्त्रिक गणतन्त्र कंगो र युगान्डामा फैलिएको इबोला संक्रमणलाई ‘अन्तर्राष्ट्रिय चासोको सार्वजनिक स्वास्थ्य आपतकाल’ घोषणा गरेको छ।
डब्लूएचओले आइतबार यो घोषणा गर्दै संक्रमण छिमेकी मुलुकमा फैलिने उच्च जोखिम औँल्याएको छ। बुन्डिबुग्यो भाइरसका कारण यो संक्रमण फैलिएको हो।
हालको अवस्था महामारी घोषणा गर्ने स्तरमा नपुगे पनि कंगोसँग स्थल सीमाना जोडिएका देशहरू उच्च जोखिममा छन्। बुन्डिबुग्यो भाइरसविरुद्ध हालसम्म कुनै स्वीकृत खोप वा उपचार उपलब्ध छैन।
संयुक्त राष्ट्रसंघीय स्वास्थ्य निकायको विवरणअनुसार शनिबारसम्म कंगोको इटुरी प्रान्तमा कम्तीमा ८० जनाको शंकास्पद मृत्यु भएको छ। आठ जनामा प्रयोगशालाबाट संक्रमण पुष्टि भएको छ भने २४६ जनामा संक्रमणको आशंका गरिएको छ।
संक्रमण बुनिया, राम्पवारा र मोंग्बवालुसहित कम्तीमा तीन स्वास्थ्य क्षेत्रमा फैलिएको डब्लूएचओले पुष्टि गरेको छ। सन् १९७६ मा इबोला भाइरस पहिचान भएपछि कंगोमा देखिएको यो १७औँ प्रकोप हो।
प्रारम्भिक नमूनामा उच्च संक्रमण दर देखिएको र शंकास्पद बिरामीको संख्या बढिरहेकोले वास्तविक संक्रमण अझ ठूलो हुन सक्ने डब्लूएचओले चेतावनी दिएको छ।
संक्रमण अन्तर्राष्ट्रिय रूपमा फैलिन थालेपछि डब्लूएचओले सीमा निगरानी, राष्ट्रिय आपतकालीन संयन्त्र सक्रिय पार्न तथा मुख्य सडक र सीमा नाकामा स्वास्थ्य परीक्षण कडा बनाउन आग्रह गरेको छ।
युगान्डाको राजधानी कम्पालामा कंगोबाट आएका दुई जनामा संक्रमण पुष्टि भएको डब्लूएचओले जनाएको छ। तीमध्ये एक जनाको मृत्यु भइसकेको छ। कंगोको राजधानी किन्सासामा पनि इटुरीबाट फर्किएका एक व्यक्तिमा संक्रमण पुष्टि भएको छ।
डब्लूएचओले इबोला संक्रमित वा संक्रमितसँग सम्पर्कमा आएका व्यक्तिलाई चिकित्सकीय उद्धारबाहेक अन्तर्राष्ट्रिय यात्रा नगर्न आग्रह गरेको छ। पुष्टि भएका बिरामीलाई तत्काल अलग्गै राख्न, सम्पर्कमा आएका व्यक्तिको दैनिक निगरानी गर्न तथा २१ दिनसम्म अन्तर्राष्ट्रिय यात्रा रोक्न सुझाव दिइएको छ।
यद्यपि, डरका कारण सीमा बन्द नगर्न वा व्यापार तथा आवागमन रोक्न पनि डब्लूएचओले आग्रह गरेको छ। त्यसो गर्दा अनुगमनबाहिरबाट हुने अवैध आवतजावत बढ्न सक्ने चेतावनी दिइएको छ।
इबोला भाइरस कंगोका घना उष्णकटिबन्धीय जंगलहरूमा प्राकृतिक रूपमा पाइन्छ। यो भाइरस संक्रमित व्यक्तिको शरीरबाट निस्किने तरल पदार्थ, संक्रमित सामग्री वा मृतकसँगको प्रत्यक्ष सम्पर्कबाट सर्छ।
इबोलाले ज्वरो, शरीर दुख्ने, बान्ता र झाडापखाला जस्ता लक्षण देखाउँछ। धेरै अवस्थामा ज्यानै जाने जोखिम रहने अफ्रिका रोग नियन्त्रण तथा रोकथाम केन्द्रले जनाएको छ।
