काभ्रेको होल्डिङ सेन्टरमा ११० सुकुमबासीलाई कैदीजस्तै थुनिएको अवस्थामा राखिएको खुलासा भएको छ, जहाँ २७ विद्यार्थीको पठनपाठन अवरुद्ध छ। प्रतिनिधि सभाको मंगलबारको बैठकमा सांसद विष्णुमाया विकले राज्यव्यवस्था तथा सुशासन समितिको अनुगमन प्रतिवेदन पेश गर्दै यो तथ्य उजागर गरिन्।
समितिको अनुगमनका क्रममा विकले होल्डिङ सेन्टरमा सुकुमबासीहरूलाई ‘कैदीजस्तै थुनिएको’ अवस्थामा भेटेको बताइन्। उनले घर भत्किएपछि मानसिक सन्तुलन गुमाएका पठाओ चालक मिलन तामाङको अवस्था पनि संसदमा उजागर गरिन्।
सभामुखमार्फत सरकारको ध्यानाकर्षण गराउँदै सांसद विकले मिलन तामाङको उपचार तथा अन्य विद्यार्थीहरूको पठनपाठनको व्यवस्था मिलाउन माग गरिन्।
