भोटेकोशी नदीमा गत बुधबार आएको बाढीले रसुवा, नुवाकोट र धादिङमा ठूलो धनजनको क्षति पुर्याएको छ। सरकारले खोज, उद्धार, राहत तथा पुनर्स्थापनालाई उच्च प्राथमिकता दिएको छ। यस विषम परिस्थितिमा स्वदेश र विदेशका विभिन्न संस्था र व्यक्तिहरूबाट सहयोग प्राप्त हुन थालेको छ।
अर्थ मन्त्रालयका अनुसार एसियाली विकास बैंक (एडीबी)ले बजेटरी सहयोगका लागि पाँच मिलियन अमेरिकी डलर अनुदान प्रतिबद्धता गरेको छ। विश्व बैंकले १६७ मिलियन अमेरिकी डलर सहुलियतपूर्ण कर्जा घोषणा गरेको छ। अमेरिकी सरकारले ५ लाख अमेरिकी डलर नगद सहयोग गर्नेछ। अस्ट्रेलिया सरकारले १ मिलियन अमेरिकी डलर नगद सहयोग गर्ने भएको छ। एडीबीले प्राविधिक सहायताका लागि १.५ लाख अमेरिकी डलर पनि उपलब्ध गराउनेछ।
भारत सरकारबाट ३ चरणमा ५७.५ टन मानवीय सहायता र औषधि प्राप्त भइसकेको छ। चीन सरकारले ३० बेलीबिज्र सहयोग गर्ने घोषणा गरेको छ। चीनले दुई हजार शव व्यवस्थापनका लागि ‘एयर टाइट ब्याग’ पनि उपलब्ध गराउनेछ। स्वीट्जरल्याण्डले १ मिलियन स्वीस फ्रयाङ संयुक्त राष्ट्र संघको व्यवस्थापनमा खर्च गर्ने प्रतिबद्धता जनाएको छ।
रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासंघ (आइएफआरसी)ले १८ करोड ९६ लाख २२ हजार (१२ लाख अमेरिकी डलर) सहयोग गर्ने जनाएको छ। आइएफआरसीका महासचिव जगन चापागाईंले नेपाल रेडक्रस र राष्ट्रिय निकायहरूसँग समन्वय गरी थप सहयोग परिचालन गर्न आइएफआरसी तयार रहेको बताएका छन्।
अक्सफामले २०० थान सरसफाइ सामग्री र १ हजार थान पानी शुद्धीकरण ट्याब्लेट उपलब्ध गराएको छ। संस्थाले अस्थायी आवास र भान्साका सामग्रीसहित करिब १.६ करोड बराबरको गैरखाद्य सामग्री तयारी अवस्थामा राखेको छ। डिसिए नेपालले धादिङमा १०० जोर गमबुट, २० थान पिक्याक्स, २० थान बेल्चा, ५० बक्स पञ्जा र ६ बक्स मास्क उपलब्ध गराएको छ। संस्थाले धादिङ र नुवाकोटमा टेन्ट, सौर्य बत्ती र खाद्यान्नको व्यवस्था गरिरहेको छ।
सेभ द चिल्ड्रेनले नुवाकोटमा २०० थान गैरखाद्य राहत सामग्री वितरण गरिसकेको छ। संस्थासँग थप ८०० थान सामग्री छ। ब्लिक्नाओ फाउन्डेसनले नुवाकोटका लागि ५.५ किलोभोल्ट एम्पियर क्षमताका दुईवटा जेनेरेटर उपलब्ध गराएको छ। बिबिसी मिडिया एक्सनले रसुवा र नुवाकोटमा रहेका रेडियो स्टेशनहरूका लागि ३.५ किलोवाट क्षमताका तीनवटा जेनेरेटर उपलब्ध गराएको छ।
एड्रा नेपालले अस्थायी आवास र खाद्य राहतमा सहयोग गर्नेछ। हेलेन केलर इन्टरनेसनलले आपत्कालीन पोषण सहयोग गर्नेछ। इस्लामिक रिलिफ नेपालले अस्थायी आवाससम्बन्धी गैरखाद्य सामग्री उपलब्ध गराउनेछ। प्लान इन्टरनेसनल नेपालले खानेपानी, सरसफाइ, अस्थायी आवास र भान्साका सामग्री उपलब्ध गराउनेछ। पिपुल इन निडले रसुवामा १४० थान गैरखाद्य सामग्री, १४० थान मर्यादा सामग्री र २७ वटा टेन्ट उपलब्ध गराएको छ।
मर्सी कप्र्सले नुवाकोटमा गैरखाद्य राहत सामग्रीका साथै खानेपानी, सरसफाइ र मानसिक स्वास्थ्य सहयोगमा काम गर्नेछ। युनाइटेड मिसन टु नेपालले धादिङमा खाद्यान्न र गैरखाद्य सामग्री उपलब्ध गराउनेछ। ह्यान्डिक्याप इन्टरनेसनलले घाइतेको व्यवस्थापन, भौतिक पुनर्स्थापना र सहायक उपकरण उपलब्ध गराइरहेको छ। केयर नेपालले खाद्यान्न, आश्रय, गैरखाद्य सामग्री, अस्थायी आवास, सरसफाइ र शिशु सामग्री उपलब्ध गराउने योजना छ।
अर्थ मन्त्रालयका अनुसार राहत सहयोग खाद्यान्नमा मात्र सीमित छैन। यो अस्थायी आवास, खानेपानी शुद्धीकरण, सरसफाइ, स्वास्थ्य, पोषण, महिला तथा बालबालिका संरक्षण, सञ्चार सेवा पुनःसञ्चालन, उद्धार उपकरण र अपाङ्गता भएका तथा घाइतेका लागि सहायक उपकरणसम्म विस्तार भएको छ।
प्रधानमन्त्री राहत कोषमा शुक्रबार रातिसम्म ४ अर्ब ३८ करोड ८ लाख ५२ हजार २५२ जम्मा भएको छ। हिमालयन र लक्ष्मी बैंकमा ६ लाख ८० हजार ६१८ अमेरिकी डलर (करिब १०.३८ करोड रुपैयाँ) जम्मा भएको छ। विदेशबाट रकम पठाउने संयन्त्रलाई थप व्यवस्थित बनाइएको छ। डेबिट/क्रेडिट कार्डबाट रकम पठाउँदा अमेरिकी डलर (USD) वा नेपाली रुपैयाँ छनोट गर्ने सुविधा थपिएको छ। मोबाइल बैंकिङ, कनेक्ट आईपीएस, डिजिटल वालेट, नेपालपे क्यूआर, अलिपे प्लस, यूपीआई, युनियन पे, इसेवा र खल्तीबाट पनि रकम पठाउन सकिने व्यवस्था मिलाइएको छ।
