वीरगञ्जको बिरयानी हाउसलाई खानामा साङ्लो भेटिएपछि २ लाख जरिवाना

पर्साको वीरगञ्जस्थित सामा मुरादावादी एन्ड हैदरावादी बिरयानी हाउसलाई खानामा मरेको साङ्लो भेटिएपछि जिल्ला प्रशासन कार्यालय, पर्साले दुई लाख रुपैयाँ जरिवाना गरेको छ। ग्राहकले खाइरहेको खानामा साङ्लो भेटिएको भिडियो सामाजिक सञ्जालमा सार्वजनिक भएपछि सहायक प्रमुख जिल्ला अधिकारी कृष्ण थापाको नेतृत्वमा बजार अनुगमन टोलीले बिरयानी हाउसमा अनुगमन गरेको थियो।

अनुगमनका क्रममा बिरयानी हाउसको भान्सा र परिसरमा सरसफाइमा लापरबाही पाइएको थियो। टोलीले दहीमा किरा र सडेको मासुसमेत फेला पारेको थियो। जिल्ला प्रशासन कार्यालय, पर्साले खाद्य स्वच्छता तथा गुणस्तरसम्बन्धी मापदण्ड उल्लङ्घन गरेको ठहर गर्दै बिरयानी हाउसलाई जरिवाना गरेको हो।

अनुगमन टोलीले बिरयानी हाउसलाई तत्काल सरसफाइमा सुधार गर्न, खाद्य सामग्रीलाई धुलो, धुवाँ र किराफट्याङ्ग्राबाट सुरक्षित राख्न निर्देशन दिएको छ। साथै, बिरयानी हाउसका सञ्चालकलाई आवश्यक कागजपत्रसहित सात दिनभित्र जिल्ला प्रशासन कार्यालयमा सम्पर्क गर्न पनि भनिएको छ।

खाद्य स्वच्छता र नयाँ कानुनको प्रभाव

यस घटनाले मधेश प्रदेशसहित देशभर खाद्य स्वच्छताको अवस्थामाथि प्रश्न उठाएको छ। नेपालमा खाद्य पदार्थमा स्वच्छता एवम् गुणस्तरसम्बन्धी चुनौती बढ्दै गएको सन्दर्भमा यस्ता अनुगमन र कारबाही महत्त्वपूर्ण मानिन्छन्। सरकारले खाद्य ऐन–२०२३ लाई संशोधन गर्दै न्यून गुणस्तरका खाद्य पदार्थको उत्पादन, प्रशोधन, निकासी, पैठारी, ढुवानी वा बिक्री वितरण गरेमा अधिकतम पाँच लाख रुपैयाँ जरिवानासहित पाँच वर्षसम्म कैद सजाय गर्ने व्यवस्था गरेको छ।

हालै राष्ट्रपति रामचन्द्र पौडेलले खाद्य स्वच्छता तथा गुणस्तरसम्बन्धी कानुनलाई संशोधन र एकीकरण गर्न बनेको विधेयक–२०८१ प्रमाणीकरण गरिसकेका छन्। यो नयाँ कानुनले खाद्य वस्तुको गुणस्तर कायम राख्न थप कडाइ गर्ने अपेक्षा गरिएको छ।

बिरयानी हाउसका सञ्चालकलाई दिइएका निर्देशनहरू कार्यान्वयन गरी सात दिनभित्र जिल्ला प्रशासन कार्यालय पर्सामा सम्पर्क गर्न भनिएको छ।