नेपाली कांग्रेसको १५ औं महाधिवेशनअन्तर्गत नयाँ केन्द्रीय नेतृत्व चयनका लागि आज दिउँसो १ बजेदेखि मतदान सुरु हुने भएको छ। केन्द्रीय निर्वाचन समितिले मतदानको समय परिवर्तन गरेको हो।
केन्द्रीय निर्वाचन समितिका संयोजक तथा वरिष्ठ अधिवक्ता प्रेमबहादुर खड्काका अनुसार, वर्षा र प्राविधिक कारणले मतदानको समय बिहान ७ बजेबाट १० बजे सारिएको थियो। पछि, थप प्राविधिक तयारीका लागि दिउँसो १ बजेदेखि मतदान सुरु हुने निर्णय गरिएको हो।
यसअघि बिहान ७ बजेदेखि मतदान सुरु गर्ने तालिका तय भएको थियो। त्यसपछि बिहान १० बजेका लागि सारिएकोमा पुनः दिउँसो १ बजेसम्मका लागि मतदान स्थगित गरिएको हो।
समितिले मतदाताहरूलाई तत्काल मतदानस्थलमा लाइनमा नबस्न आग्रह गरेको छ। दिउँसो १ बजेपछि मात्र मतदान प्रक्रियामा सहभागी हुन अनुरोध गरिएको छ।
नेपाली कांग्रेसले आफ्नो नयाँ केन्द्रीय नेतृत्व चयनका लागि मतदान प्रक्रिया सुरु गर्न लागेको हो। यस महाधिवेशनबाट पार्टीको सभापतिसहित अन्य पदाधिकारी तथा केन्द्रीय सदस्यहरू निर्वाचित हुनेछन्।
