नेकपा एमालेले राष्ट्रिय प्रतिनिधि परिषद्को बैठक बोलाउने निर्णय गरेको छ। भोलिदेखि सुरु हुने केन्द्रीय कमिटी बैठकका लागि एजेण्डा तय गर्न बसेको सचिवालय बैठकले यो सहमति जुटाएको हो।
महासचिव शंकर पोखरेलका अनुसार, एमालेको १०औँ सचिवालय बैठकले कार्यदलले तयार पारेको प्रतिवेदनलाई अनुमोदन गरेको छ। उपाध्यक्ष रामबहादुर थापा र महासचिव पोखरेलले तयार पारेको प्रतिवेदनलाई एकीकृत गरी अन्तिम रूप दिइएको थियो। कार्यदलका संयोजक थापाले सचिवालय बैठकमा प्रतिवेदन पेस गरेका थिए।
अध्यक्ष केपी शर्मा ओलीको निर्देशनमा पूर्व उपमहासचिव प्रदीप ज्ञवालीले पछिल्लो प्रतिवेदन तयार पारेका थिए। उक्त प्रतिवेदनमा देशभरबाट प्राप्त सुझावलाई अनुसूचीका रूपमा समावेश गरिएको छ। प्रतिवेदनमा रहेको ‘तत्काल पुनर्गठन’ भन्ने शब्द हटाइएको छ।
कार्यदलको छलफलपछि सचिवालय बैठकले प्रतिवेदनलाई अन्तिम रूप दिएसँगै केन्द्रीय कमिटी बैठकका लागि आवश्यक एजेण्डा तय भएको छ। अब केन्द्रीय कमिटी बैठकले राष्ट्रिय प्रतिनिधि परिषद्को बैठक आयोजना गर्नेलगायत सचिवालयबाट प्रस्तावित विषयमा छलफल गर्नेछ।
