डोल्पाको छार्का ताङसोङमा फोरजी सेवा सुरु
नेपाल टेलिकमले डोल्पाको छार्का ताङसोङ गाउँपालिकाको केन्द्र कागकोटमा फोरजी सेवा सुरु गरेको छ। यो सेवा ४२०० मिटर उचाइमा रहेको मुकोट टावरबाट सञ्चालनमा आएको छ।
नेपाल टेलिकमका प्रवक्ता डा. कमल लामिछानेका अनुसार, माइक्रोवेभ रेडियोमार्फत सेवा विस्तार गरिएको हो। यससँगै टेलिकमको फोरजी सेवा पुगेका स्थानीय तहको सङ्ख्या ७५० पुगेको छ।
माथिल्लो डोल्पामा यो पहिलो फोरजी साइट हो। डोल्पाका डोल्पो बुद्ध र शे फोक्सुन्डो गाउँपालिका तथा मनाङको नार्पा भूमि गाउँपालिकामा टेलिकमको फोरजी सेवा पुग्न बाँकी छ।
टेलिकमले निकट भविष्यमा ती स्थानीय निकायमा समेत सेवा विस्तार गर्ने जनाएको छ।
फोरजी सेवाले स्थानीय बासिन्दा, पदयात्री र पर्यटकको सञ्चार पहुँच सहज बनाउनेछ। यसले प्रशासनिक, स्वास्थ्य र शैक्षिक गतिविधिमा सहयोग पुग्ने अपेक्षा छ। दुर्गम हिमाली क्षेत्रलाई डिजिटल नेटवर्कमा जोड्दै क्षेत्रीय विकासमा टेवा पुग्ने विश्वास छ।
प्रवक्ता लामिछानेले सुगमदेखि अति दुर्गम स्थानमा अत्याधुनिक दूरसञ्चार सेवा पुर्याउने प्रतिबद्धता दोहोर्याए।
