कागेश्वरी मनोहरा नगरपालिकाकी भवन निर्माण तथा बस्ती विकास शाखा प्रमुख इन्जिनियर दीपा कार्की ६४ हजार रुपैयाँ घुससहित पक्राउ परेकी छन्। अख्तियार दुरुपयोग अनुसन्धान आयोगको टोलीले सेवाग्राहीबाट घुस लिइसकेको अवस्थामा उनलाई रंगेहात नियन्त्रणमा लिएको हो।
आयोगका अनुसार इन्जिनियर कार्कीले ‘स्ट्रक्चर एनालाइसिस’ को काम स्वीकृत गरिदिने बहानामा सेवाग्राहीसँग पटकपटक घुस माग गरिरहेकी थिइन्। यस कार्यमा मध्यस्थकर्ताको भूमिका खेल्ने आस्मा कार्की पनि संलग्न रहेको पाइएको छ।
सेवाग्राहीको सूचना एवं उजुरीका आधारमा अख्तियारको केन्द्रीय कार्यालय टङ्गालबाट खटिएको टोलीले नगरपालिका कार्यालय थली, डाँछीबाट सोमबार दुवै जनालाई पक्राउ गरेको थियो।
पक्राउ परेका दुवै जनाविरुद्ध विशेष अदालतबाट म्याद थप अनुमति लिई घुस/रिसवत भ्रष्टाचारसम्बन्धी मुद्दामा विस्तृत अनुसन्धान अघि बढाइएको अख्तियारका प्रवक्ता सुरेश न्यौपानेले जानकारी दिए।
