मकवानपुरको भीमफेदी-८ महादेवटारमा निर्माणाधीन फास्ट ट्र्याकमा लोडरले किचेर चिनियाँ सुपरभाइजर गुओ फाङ्सुनको मृत्यु भएको छ। शनिबार दिउँसो करिब २ बजे काम गर्ने क्रममा लोडरको पछाडिको चक्काले किच्दा ५१ वर्षीय फाङ्सुनको घटनास्थलमै ज्यान गएको हो। Nmkhabarलाई प्रहरीले पुष्टि गर्यो।
फाङ्सुन चाइना रेलवे नम्बर-२ इन्जिनियरिङ ग्रुप कम्पनी लिमिटेडमा सुपरभाइजर थिए। कञ्चनपुरको शुक्लाफाँटा-१ घर भएका ४८ वर्षीय गौरसिंह साउदले लोडर चलाएका थिए। प्रहरीका अनुसार लोडरको पछाडिको चक्काले किचेर फाङ्सुन गम्भीर घाइते भएका थिए।
घटनास्थल जाँच मुचुल्का सकिएको छ। शव पोस्टमार्टमका लागि काठमाडौंस्थित त्रिवि शिक्षण अस्पताल महाराजगञ्जको शवगृहमा राखिएको छ। प्रहरीले घटनाबारे थप अनुसन्धान गरिरहेको छ।
