अविरल वर्षा, बाढी, पहिरो र हावाहुरीले देशभर २१ नागरिकको ज्यान लिएको छ। प्रधानमन्त्री बालेन शाहले आइतबार साँझ देशवासीका नाममा सम्बोधन गर्दै अझै जोखिम कायमै रहेकाले उच्च सतर्कता अपनाउन अपिल गरेका छन्।
असोज ८ गतेयता म्याग्दी, डोल्पा, धनुषा, पाल्पा, बागलुङ, लमजुङ, रुकुम पश्चिम, काभ्रे, धादिङ, मकवानपुर र सुर्खेतलगायत जिल्लामा चट्याङ, बाढी, पहिरो र वर्षाका कारण २१ नागरिकको मृत्यु भएको छ। प्रधानमन्त्रीले विपद्मा घाइते भएका ५ जनाको सम्पूर्ण उपचार खर्च सरकारले निःशुल्क बेहोर्ने बताए।
देशभर ४३९ वटा मनसुनजन्य विपद्का घटना दर्ता भएका छन्। मनाङको हिमपहिरोमा परेकासहित ५ नागरिक बेपत्ता छन्। उनीहरूको खोजी र बाढीमा फसेकाहरूको उद्धारमा सुरक्षाकर्मी खटिएका छन्।
ऊर्जा क्षेत्रमा गम्भीर असर परेको छ। कालीगण्डकी, मर्स्याङ्दी र सेती-मादी करिडोरबाट राष्ट्रिय प्रसारण लाइनमा जोडिएको १,०१३.२ मेगावाट विद्युत् आपूर्ति बन्द भएको छ। प्रसारण टावर ढल्दा ३१८ मेगावाट क्षमताका आयोजना ठप्प भएका छन्। जोखिम न्यूनीकरणका लागि ६९५.२ मेगावाट उत्पादन बन्द गरिएको छ। विद्युत् पुनःस्थापनाका लागि प्राविधिक टोली परिचालन भइसकेको छ।
नारायणी नदीको बाढीले क्रुजसिप बगाएर पुलमा अड्काएपछि पूर्व-पश्चिम राजमार्ग बन्द गरिएको छ। पृथ्वी राजमार्ग, बीपी राजमार्ग र कान्ति लोकपथसहित दर्जनभन्दा बढी सडक अवरुद्ध छन्। कालीगण्डकीको पक्की पुल बगेको छ। भोटेकोशी-त्रिशूली नदी तटीय सडकमा पुनः क्षति पुगेको छ।
महाकाली नदीमा बहाव उच्च भएपछि कञ्चनपुरको गड्डाचौकी नाका प्रभावित भएको छ। बनवासा पुलमा सवारी रोकिएको छ। सेती, नारायणी र कमला नदी तथा कुलेखानी क्षेत्रमा पानीको बहाव उच्च छ। हावाहुरीसहितको वर्षाले किसानको धान र तरकारी बालीमा ठूलो क्षति पुर्याएको छ।
मौसम पूर्वानुमानका आधारमा सरकारले रात्रीकालीन यातायात र विद्यालय बन्द गराएको थियो। ७७ वटै जिल्ला कमान्ड पोस्ट सक्रिय पारिएकाले हिमाली क्षेत्रका पदयात्री र विद्यार्थी जोगिए। प्रभावित परिवारलाई स्थानीय तहसँग समन्वय गरी अस्थायी बसोबासको प्रबन्ध मिलाइएको छ।
प्रधानमन्त्री शाहले विपद्को जोखिम अझै नटरेकाले अत्यावश्यक कामबाहेक यात्रा नगर्न आग्रह गरे। संकट परेमा निःशुल्क नम्बर १२३४ मा फोन गर्न सकिनेछ। भ्रामक सूचना फैलाउने, पीडितको गोपनीयता भङ्ग गर्ने र कालोबजारीमा संलग्न हुनेमाथि सरकारले निगरानी राखिरहेको छ।
