गण्डकी र कर्णाली प्रदेशका विभिन्न स्थानमा बाढी पहिरोका कारण सडक यातायात प्रभावित भएको छ। नेपाल प्रहरीका अनुसार, म्याग्दीको रघुगंगा गाउँपालिका–२ बैसरीमा पहिरो खस्दा बेनी–जोमसोम सडकखण्ड एकतर्फी सञ्चालनमा छ।
गोरखाको आरुघाट गाउँपालिका–२, ३ र ४ तथा नयाँपुल क्षेत्रमा बाढीले सडक अवरुद्ध भएको प्रहरीले जनाएको छ। सोतिगाउँस्थित फलामे पुल बगाउँदा आरुघाटबाट धार्चे जोड्ने सडक पूर्ण रूपमा अवरुद्ध भएको छ। गोरखाकै आरुघाट गाउँपालिका–१ नयाँपुलस्थित सडकमा बाढीका कारण यातायात प्रभावित भई साना सवारीसाधन मात्र सञ्चालनमा छन्।
सुर्खेतको बराहताल गाउँपालिका–५ ओइलिसेमा पहिरो खस्दा कर्णाली राजमार्ग एकतर्फी सञ्चालनमा रहेको छ। नेपाल प्रहरीका प्रवक्ता, प्रहरी नायब महानिरीक्षक विनोद घिमिरेका अनुसार, पछिल्लो दुई दिनको भारी वर्षापछि अवरुद्ध भएका १० सडकमध्ये ७ वटामा यातायात सञ्चालनमा आएको छ भने ३ स्थानमा अझै यातायात ठप्प छ।
नवलपरासी बर्दघाट सुस्तापूर्वको विनयी खोलामा डाइभर्सन बगाउँदा अवरुद्ध सडक अझै सञ्चालनमा आउन सकेको छैन। रोल्पाको त्रिवेणी गाउँपालिका–७ जङ्डाँडामा पहिरोले घोराही–रुकुम सहिदमार्ग अवरुद्ध भएको छ। पाल्पाको तिनाउ नगरपालिका–३ सुरुङमार्गमा पहिरोका कारण सिद्धार्थ राजमार्ग पनि बन्द छ।
रसुवामा बाढीका कारण मुख्य राजमार्गहरू असोज १० गतेदेखि पूर्ण रूपमा बन्द छन् र अर्को सूचना नभएसम्मका लागि बन्द रहनेछन्। मनाङमा असोज १८ गते बाढी आएका कारण बेशीसहर हुँदै खाङसारसम्म जाने सडक खण्ड एकतर्फी भएको छ।
म्याग्दीको बेनी-जोमसोम सडक खण्ड अन्तर्गत रघुगंगा गाउँपालिका-२ बैसरी र अन्नपूर्ण गाउँपालिका-३ सुकेबगरमा पहिरोको कारण यातायात पूर्ण रूपमा अवरुद्ध भएको छ। पूर्वी नवलपरासीको बुलिङटार गाउँपालिका–६ घुमाउरी घाटमा पहिरोले प्रभावित कालीगण्डकी करिडोर असोज १० गते बिहान ११ बजेर ३० मिनेटदेखि एकतर्फी सञ्चालनमा छ।
बौदीकाली गाउँपालिका–३ जन्ती पहिरोस्थित कालीगण्डकी करिडोरमा असोज १४ गते अपराह्न ४ बजेर ४५ मिनेटदेखि पहिरोका कारण एकतर्फी आवागमन भए पनि ठूला सवारीसाधन जान सक्ने अवस्था छैन। कोशी र बागमती प्रदेशका पाँच ठाउँमा सडक पूर्णरुपमा अवरुद्ध भएका छन्। संखुवासभाको भोटखोला गाउँपालिका–४ बरुणमा अविरल वर्षाले सडक अवरुद्ध भएको छ।
प्रहरीले सम्बन्धित सडकखण्डमा यात्रा गर्ने सर्वसाधारणलाई आवश्यक सावधानी अपनाउन आग्रह गरेको छ।
