सरकारले आइतबार सार्वजनिक बिदा हटाउने वा दुई दिनको सप्ताहन्त अन्त्य गर्ने भन्ने हल्लाको खण्डन गरेको छ। केही सञ्चार माध्यममा आएका यस्ता प्रतिवेदनहरूलाई सरकारले पूर्ण रूपमा असत्य भनेको छ।
प्रधानमन्त्रीका प्रेस तथा अनुसन्धान सल्लाहकार दीपा दाहालले आइतबारको बिदा रद्द गर्ने वा दुई दिनको सप्ताहन्त प्रणाली अन्त्य गर्ने सम्बन्धमा सरकारले कुनै निर्णय नगरेको र त्यस्तो कुनै तयारी पनि नभएको स्पष्ट पारेकी छन्।
यसअघि सरकारले वैशाख २२ को मन्त्रिपरिषद् निर्णयबाट इन्धनको बढ्दो मूल्य र आर्थिक दबाबका कारण मितव्ययी उपाय अपनाउँदै शनिबार र आइतबारलाई सार्वजनिक बिदा तोकेको थियो। यस निर्णयसँगै सरकारी कार्यालय र शैक्षिक संस्था शनिबार र आइतबार बन्द रहने व्यवस्था गरिएको थियो भने कार्यालय समय बिहान ९ बजेदेखि बेलुका ५ बजेसम्म कायम गरिएको थियो।
