सङ्खुवासभाको मादी नगरपालिका–४ ओखरबोटेका विनोद निरौलाको घर पहिरोको उच्च जोखिममा छ। घरमाथिबाट पहिरो खसेपछि निरौलाको पाँच जनाको परिवार विस्थापित भएको छ। जिल्ला प्रहरी कार्यालयका सूचना अधिकारी धनबहादुर राजवंशीले यो पुष्टि गरे। चैनपुर–६ भञ्ज्याङखर्कमा पहिरो खस्दा पाँचखपन–चैनपुर सडकखण्डमा यातायात सेवा अवरुद्ध भएको छ। सिलिचोङ गाउँपालिका–२ को वाला माध्यमिक विद्यालय भवन पनि पहिरोको जोखिममा छ। जिल्ला प्रशासन कार्यालयले अरुण, वरुण, हेवा र सभा खोलाको जलसतह बढेको जनाउँदै सतर्क रहन अनुरोध गरेको छ।
सिरहाको विष्णुपुर गाउँपालिका–१ का किसान गोपिन्द्र यादवको करिब दुई बिघा जमिनमा लगाइएको उखुबारीमा वर्षा र हावाहुरीले क्षति पुर्याएको छ। उखुका बोटहरू ढलेपछि उत्पादन घट्ने र लगानीसमेत नउठ्ने चिन्ता यादवले व्यक्त गरे। उनले चार लाख रुपैयाँ ऋण लिएर उखुखेती गरेका थिए। १० लाख रुपैयाँ आम्दानीको अपेक्षा थियो। हावाहुरी र वर्षाले लगानीसमेत डुब्ने अवस्था आएको उनको भनाइ छ।
