इनम सापकोटाको बयानमा चोलेन्द्रशमशेर जबरासहित न्यायाधीश, नेता र व्यवसायीको नाम

प्रहरी हिरासतमा रहेका झापा दमकका ३१ वर्षीय इनम सापकोटाको बयानले काठमाडौँ जिल्ला अदालतको मुद्दा मिलाउन ३ करोड र नेपाली कांग्रेसको आधिकारिकता विवादमा १८ करोड रुपैयाँसम्मको कारोबार भएको खुलासा गरेको छ। त्रिभुवन अन्तर्राष्ट्रिय विमानस्थलबाट असोज १४ गते पक्राउ परेका सापकोटामाथि सम्पत्ति शुद्धीकरण ऐन र राष्ट्र बैंक ऐनका प्रावधानअनुसार अनुसन्धान जारी छ।

सापकोटाले आफू पूर्वप्रधानन्यायाधीश चोलेन्द्रशमशेर जबरासँग निकट रहेको र उच्च पदस्थ तथा व्यापारीहरूसँग करोडौँ रुपैयाँको कारोबार गरेको दाबी गरेका छन्। सापकोटाको बयानमा पूर्वप्रधानन्यायाधीश जबराका भाइ प्रभुशमशेर जबरा, भाटभटेनी सुपरमार्केटका सञ्चालक मीनबहादुर गुरुङ, नेपाली कांग्रेसका सभापति गगनकुमार थापा, कांग्रेसका पूर्वकोषाध्यक्ष उमेश श्रेष्ठ, नेता दीपक खड्का र सर्वोच्च अदालतकी न्यायाधीश सारंगा सुवेदीको नाम आएको छ।

मुद्दा मिलाउन ३ करोडको डिल

इनम सापकोटाका अनुसार काठमाडौँ जिल्ला अदालतमा विचाराधीन एउटा मुद्दा मिलाउन तीन करोड रुपैयाँको डिल भएको थियो। उनले ललितपुरको कुपण्डोलस्थित हिमालयन होटलका अध्यक्ष नवीन तुलाधरमार्फत २० लाख रुपैयाँ आएको र तीन करोड रुपैयाँ चोलेन्द्रशमशेर जबराका लागि भएको दाबी गरेका छन्। यो रकम भाटभटेनीका सञ्चालक मीनबहादुर गुरुङकहाँ पुगेको पनि सापकोटाले बयानमा उल्लेख गरेका छन्।

उनले हिमालयन बैंकका सञ्चालक प्रभुशमशेर जबराबाट आएको रकम भाटभटेनी सुपरमार्केटमार्फत घुमाएको र मीनबहादुर गुरुङ तथा प्रभुशमशेर जबरा आफूसँग साझेदारीमा रहेको दाबी गरेका छन्। सापकोटाले सर्वोच्च अदालतकी न्यायाधीश सारंगा सुवेदीलाई तीन करोड रुपैयाँ बुझाएको पनि आफ्नो बयानमा उल्लेख गरेका छन्। उनले पूर्वप्रधानन्यायाधीश जबराले आफूलाई गगन थापा र निर्वाचन आयोगका सगुनशमशेर राणालाई सहयोग गर्न निर्देशन दिएको तथा नेता दीपक खड्काले जबरासँग चिनजान गराएको पनि बताएका छन्।

कांग्रेस आधिकारिकता विवादमा १८ करोडको दाबी

सापकोटाको बयानमा नेपाली कांग्रेसको आधिकारिकता विवादमा १८ करोड रुपैयाँको डिल भएको दाबी पनि गरिएको छ। उनले प्रभावशाली व्यक्तिहरूसँग साझेदारीमा रकम परिचालन र लेनदेन गरेको बताएका छन्। यसबाहेक, उनले कांग्रेसका पूर्व कोषाध्यक्ष उमेश श्रेष्ठको जग्गा आफ्नो नाममा लिने प्रक्रियामा रहेको पनि उल्लेख गरेका छन्।

प्रहरीको अनुसन्धानले सापकोटाको मोबाइलको डीएफएल जाँच गर्दा थुप्रै हाइप्रोफाइल व्यक्तिहरूसँगको सम्पर्क देखिएको जनाएको छ। उनले न्यायाधीश हरि फुयाल र प्रधानमन्त्री बालेन शाहसँग ह्वाट्सएपमा संवाद गरेको पनि बयानमा उल्लेख छ। नयाँ सरकार बनेपछि कारोबार बढेको र वैशाख-जेठदेखि ठूलो कारोबार सुरु भएको उनको भनाइ छ।

विदेशी बैंक खाता र २७ देशको यात्रा

इनम सापकोटाले आफ्नो बयानमा २७ देश घुमेको र जर्मन तथा स्वीस बैंकमा खाता रहेको बताएका छन्। पछिल्लो समय बेल्जियमको वाइज बैंकबाट कारोबार गरेको र नेपालमा एनआईएमबी, सिटिजन्स बैंक, भारतीय स्टेट बैंक (एसबीआई) तथा प्रभु बैंकमा खाता खोलेको पनि उनको भनाइ छ। यद्यपि, उनले क्रेडिट कार्डको ऋण नतिरेको पनि स्वीकार गरेका छन्।

सापकोटाले शेयर कारोबारी अतितलाल श्रेष्ठसँग मिलेर शेयर कारोबार गरेको र आई फ्लिक्स मलको कारोबार टुंग्याएको पनि जानकारी दिएका छन्। उनले आफूलाई विदेशी दूतावासको चिकित्सक भएको परिचय दिने गरेको र पूर्वप्रधानन्यायाधीश जबरा, बहालवाला तथा पूर्वन्यायाधीश र सुरक्षा अधिकारीहरूसँग सम्पर्कमा रहेको पनि खुलेको छ। अनुसन्धानका क्रममा उनको आईजीपी दानबहादुर कार्की र एआईजीपी राजन अधिकारीसँग पनि सम्पर्क रहेको खुलेको छ।

अनुसन्धानको दायरा र चुनौती

इनम सापकोटालाई असोज १४ गते त्रिभुवन अन्तर्राष्ट्रिय विमानस्थलबाट पक्राउ गरिएपछि सर्वोच्च अदालतले उनको पक्राउलाई कानुनसम्मत ठहर गर्दै बन्दी प्रत्यक्षीकरणको रिट खारेज गरिसकेको छ। काठमाडौँ उपत्यका प्रहरी कार्यालय रानीपोखरीले एसपी नरहरि रेग्मीको नेतृत्वमा विशेष अनुसन्धान समिति गठन गरी यस प्रकरणको छानबिन गरिरहेको छ।

प्रहरीले सापकोटामाथि मुद्दामा अनुचित प्रभाव पार्ने र सुरक्षा निकायमा सरुवा, बढुवामा चलखेल गरेको विषयमा पनि अनुसन्धान गरिरहेको छ। उनको दोहोरो पासपोर्ट रहेको आशंकामा अध्यागमन विभागबाट ट्राभल हिस्ट्री झिकाएर अनुसन्धान भइरहेको छ। जिल्ला प्रहरी परिसर काठमाडौँले अनुसन्धानसँग सम्बन्धित संवेदनशील विवरण, प्रमाण तथा सूचना सार्वजनिक नगर्न आग्रह गर्दै कानुनबमोजिम कारबाही हुने चेतावनी दिएको छ।

यस सापकोटा प्रकरणमा व्यवसायी दीपक भट्टको भूमिका अर्को महत्वपूर्ण कडीका रूपमा जोडिएको छ। दीपक भट्ट हाल सम्पत्ति शुद्धीकरण र बैंकिङ कसुरलगायतका मुद्दामा अनुसन्धान तथा अभियोजन भई जेलमा छन्। भट्टलाई पुर्पक्षका लागि थुनामा पठाउने आदेश भएपछि उनलाई रिहाइ गर्न माग गर्दै सर्वोच्च अदालतमा निवेदन दर्ता भएको थियो। यस्तै घटनाक्रमको अनुसन्धान गर्ने क्रममा प्रहरी पूर्वप्रधानन्यायाधीश जबरा र सापकोटाबीचको सम्पर्कसम्म पुगेको थियो। यस प्रकरणमा इनम र सर्वोच्च अदालतका न्यायाधीश हरि फुयालबीचको ह्वाट्सएप संवाद बाहिरिएको छ। राष्ट्रिय स्वतन्त्र पार्टीले न्यायाधीश हरि फुयालमाथि महाभियोग प्रक्रिया अघि बढाउने संकेत शनिबारको सचिवालय बैठकबाटै गरिसकेको छ।

सुरक्षा निकायका उच्च अधिकारीसँगको सम्पर्क पनि यस प्रकरणको अर्को पक्ष हो। पूर्वप्रधानन्यायाधीश जबरा प्रहरी कार्यालयमा रहँदा सशस्त्र प्रहरीका अतिरिक्त महानिरीक्षक वंशीराज दाहालले रातिको समयमा उनलाई भेट्न पुगेका थिए। यस भेटघाटबारे प्रहरी नेतृत्वलाई पूर्वजानकारी नदिइएको पाइएपछि दाहालको भूमिकामाथि छानबिन सुरु गरिएको थियो। सापकोटासँगको सम्पर्क र संवेदनशील सूचना बाहिरिएको आरोपमा दाहालमाथि विभागीय अनुसन्धानपछि निलम्बन र सरकारले पदबाटै बर्खास्त गरेको छ।

सापकोटाले बयानमा उल्लेख गरेका कारोबारको सत्यता र नाम जोडिएका व्यक्तिहरूको भूमिकाबारे प्रहरीको अनुसन्धानबाट थप खुल्नेछ। तीन करोडको डिल कसले गर्‍यो, रकम कसले दियो, कसले लियो र त्यसको उद्देश्य के थियो भन्ने विषयमा प्रहरीको अनुसन्धान अझै जारी छ।