प्रभु बैंकबाट कर्जा लिएर दुरुपयोग गरेको आरोपमा जानकी मेडिकल कलेजका अध्यक्ष ओमप्रसाद पाण्डे पक्राउ परेका छन्। प्रहरीको केन्द्रीय अनुसन्धान ब्युरो (सीआईबी)ले पाण्डेलाई धनुषाको छिरेश्वरनाथ-१ रमदैयास्थित कलेज परिसरबाटै नियन्त्रणमा लिएको हो।
पाण्डेले कृत्रिम कम्पनी खडा गरी, विस्तृत परियोजना प्रतिवेदन (DPR) बिना नै धितोको अस्वभाविक मूल्याङ्कन गराएर प्रभु बैंकबाट ऋण लिएको पाइएको छ। सो कर्जाको रकम पटकपटक दुरुपयोग गरी अन्यत्र लगानी गरेको खुलेपछि सीआईबीले उनलाई पक्राउ गरेको हो।
सीआईबीका एक उच्च अधिकारीका अनुसार पाण्डेमाथि ‘बैंकिङ कसुर तथा सजाय ऐन, २०६४’ अन्तर्गतको कसुरमा अनुसन्धान भइरहेको छ। पाण्डे विरुद्ध उच्च अदालत पाटनबाट २०८२ मंसिर २८ गते पक्राउ पुर्जी जारी भएको थियो।
त्रिभुवन विश्वविद्यालयअन्तर्गतको जानकी मेडिकल कलेज सन् २००३ मा स्थापना भएको थियो।
