राष्ट्रिय स्वतन्त्र पार्टीका अध्यक्ष रवि लामिछाने र उनकी पत्नी निकिता पौडेलको आगमनले जनकपुरधाममा छठ पर्वको सुरक्षा व्यवस्था कडा पारिएको छ। आज (कात्तिक २८ गते, शनिबार) जनकपुरधाम आइपुगेका लामिछाने दम्पतीले गंगासागर पोखरीमा छठ मनाउने भएकाले स्थानीय प्रशासनले विशेष सुरक्षा नियम लागू गरेको छ।
गंगासागर छठ पूजा समितिले शनिबार पत्रकार सम्मेलन गरी सुरक्षा नियमबारे जानकारी गराएको छ। समितिका सभापति सतिशकुमार लाल दासले विशिष्ट अतिथिहरूको आगमनलाई मध्यनजर गर्दै गंगासागर घाटमा नेपाल प्रहरी, सशस्त्र प्रहरी बल र स्वयंसेवक खटाएर कडा सुरक्षा व्यवस्था र भिडभाड नियन्त्रणको प्रबन्ध मिलाइएको बताएका छन्।
पृष्ठभूमि
- छठ पर्व २०८३ कात्तिक २७ गते (शुक्रबार) देखि सुरु भई कात्तिक ३० गते (सोमबार) सम्म चल्नेछ।
- छठ पर्वको मुख्य दिन सन्ध्या अर्घ्य कात्तिक २९ गते (आइतबार) हो।
- गंगासागर छठ पूजा समितिले २०५० सालदेखि छठ पर्वको व्यवस्थापन गर्दै आएको छ।
- रवि लामिछाने र निकिता पौडेलले यस वर्ष जनकपुरधाममा छठ पर्व मनाउने जानकारी कात्तिक २६ गते (नोभेम्बर १२, २०२६) मा सार्वजनिक भएको थियो।
जिल्ला सुरक्षा समितिको निर्णयअनुसार छठ पर्व चल्ने अवधिभर गंगासागर क्षेत्र नजिकका स्थानमा माछा, मासु र मदिरा बिक्री गर्ने पसलहरू बन्द गरिने आदेश जारी भएको छ। यसैगरी, घाट क्षेत्रभित्र डिजे बजाउन, मादक पदार्थ सेवन गरी होहल्ला गर्न र पटाका पड्काउनमा रोक लगाइएको सभापति दासले जानकारी दिए।
छठ पर्वका मुख्य दिनहरूमा गंगासागर पोखरीको चारै दिशाका डिल र पूजास्थल परिसरमा सवारी साधन प्रवेश तथा पार्किङमा रोक लगाइएको छ। पोखरीको चारैतिर ठेलागाडा, फुटपाथ पसल र अस्थायी व्यवसाय सञ्चालन गर्न पनि निषेध गरिएको छ। सवारीसाधनको आवागमनलाई सहज बनाउनका लागि कात्तिक २९ गते दिउँसो ४ बजेदेखि ३० गते बिहानको अर्घ्य नटुंगिएसम्म विशेष ट्राफिक व्यवस्था लागू गरिनेबारे समितिले सूचना दिएको छ।
गंगासागर घाटमा व्यवस्थापन चुनौती
यस वर्ष गंगासागर घाटमा करिब आठ हजार श्रद्धालुले छठ मनाउने अनुमान गरिएको छ। गंगासागर छठ पूजा समितिले व्यवस्थापन खर्च जुटाउन प्रतिघर ६ सय रुपैयाँ सहयोग रकम निर्धारण गरेको छ। समितिले करिब साढे तीन सय घरपरिवारबाट रसिद काटेर सहयोग संकलन गर्ने र बाँकी श्रद्धालुहरूका लागि निःशुल्क व्यवस्थापन गरिने जनाएको छ। समितिका अध्यक्ष सतिशकुमार लाल दासका अनुसार जनकपुरधाम उपमहानगरपालिकाले पछिल्ला तीन–चार वर्षदेखि छठ पर्वको व्यवस्थापनका लागि आर्थिक सहयोग गरेको छैन।
राष्ट्रिय स्वतन्त्र पार्टी मधेश प्रदेश कार्यालयका अनुसार रवि लामिछाने दम्पती आज दिउँसो १२:१५ बजे जनकपुर विमानस्थलमा अवतरण गर्ने कार्यक्रम छ। त्यसपछि जनकपुरधाम उद्योग वाणिज्य संघको सभाहलमा शुभकामना आदानप्रदान तथा पार्टी कार्यकर्ताहरूसँग भेटघाट गर्नेछन्। आइतबार (कात्तिक २९ गते) दिउँसो ३ बजेदेखि उनीहरू गंगासागरमा छठ पर्वको पूजा अर्चना तथा धार्मिक अनुष्ठानमा सहभागी हुनेछन्। सोमबार (कात्तिक ३० गते) बिहान ४ बजे उदाउँदो सूर्यलाई अर्घ्य अर्पण गरेपछि बिहान ८ बजे जनकपुर विमानस्थलबाट काठमाडौँ प्रस्थान गर्ने कार्यक्रम छ।
यसअघि: रवि लामिछाने जनकपुरमा सर्वसाधारणको घरमा बसेर छठ मनाउने
