कमला पुल मङ्सिर पहिलो सातादेखि सञ्चालनमा आउने, धनुषा र सिरहामा यातायात सहज हुने

धनुषा र सिरहा जिल्लालाई जोड्ने हुलाकी सडकअन्तर्गत कमला नदीमाथि निर्माणाधीन पुल मङ्सिरको पहिलो सातादेखि सञ्चालनमा आउने तयारी छ। लामो समयदेखि अवरुद्ध पुलको निर्माण कार्य अन्तिम चरणमा पुगेको हुलाकी राजमार्ग निर्देशनालय योजना कार्यालय जनकपुरधामले जनाएको छ।

वर्षायाममा कमला नदीमा पानीको बहाव उच्च हुँदा स्थानीय बासिन्दालाई आवतजावत गर्न समस्या परिरहेको थियो, किनकि त्यहाँ पुलको अभाव थियो। जोखिम मोलेर नदी पार गर्नुपर्ने र डुङ्गाको सहारा लिनुपर्ने बाध्यता थियो। कमला नगरपालिकाका बासिन्दा सुमनकुमार यादवले पुल सञ्चालनमा आएपछि सिरहा र धनुषा जिल्लाबीचको यातायात सम्पर्क निकै सहज बन्ने बताएका छन्।

यादवका अनुसार यस पुलको सञ्चालनले दैनिक कामकाज, शिक्षा, स्वास्थ्य सेवा, व्यापारिक कारोबार र सामाजिक भेटघाटजस्ता कामका लागि दुई जिल्लाका सर्वसाधारणलाई आवतजावत गर्न सहज हुनेछ। यसका साथै, कृषि उपज र स्थानीय उत्पादनको ढुवानीमा सहजता आउने तथा स्थानीय बजार र व्यवसायमा समेत सकारात्मक प्रभाव पर्ने अपेक्षा गरिएको छ।

हुलाकी राजमार्ग निर्देशनालय योजना कार्यालय जनकपुरधामका प्रमुख कृष्णकुमार महतोले पुलको ढलान कार्य पूरा भइसकेको र दुवैतर्फ जोड्ने सडकमा माटो भर्ने कामलाई तीव्र पारिएको जानकारी दिए। विसं २०७८ असार महिनामा पुलको उद्घाटनको तयारी चलिरहेका बेला आएको बाढीले पिलर भत्काएपछि यसको निर्माण कार्य रोकिएको थियो।

मधेसको आर्थिक गतिविधिमा टेवा

सिरहाबाट मधेस प्रदेशको राजधानी जनकपुरधाम पुग्न हाल वैकल्पिक मार्ग प्रयोग गर्दा २ देखि ३ घन्टासम्म लाग्ने गरेकोमा पुल खुलेपछि करिब ३० मिनेटमै पुग्न सकिनेछ। हुलाकी सडक विस्तार तथा स्तरोन्नतिले ग्रामीण क्षेत्रको आर्थिक गतिविधिमा सकारात्मक प्रभाव पार्न थालेको स्थानीय जनप्रतिनिधि तथा व्यवसायीले बताएका छन्। धनुषाको औरही गाउँपालिकाका अध्यक्ष उमाशङ्कर प्रसाद साहले हुलाकी राजमार्ग निर्माणसँगै आसपासका क्षेत्रमा जग्गाको मूल्य उल्लेख्य रूपमा बढेको उल्लेख गरे।

कमला पुलको कुल लागत २४ करोड ९० लाख ९७ हजार रुपैयाँ रहेको छ, जसमध्ये निर्माण कम्पनीले हालसम्म २३ करोड १९ लाख रुपैयाँ भुक्तानी पाइसकेको छ। नदी नियन्त्रणका लागि सरकारले २५ करोड रुपैयाँ बजेट सुनिश्चित गरेको छ।

निर्देशनालयका प्रमुख महतोले माटो भर्ने काम सकिएलगत्तै मङ्सिरको पहिलो साताभित्र पुललाई पूर्ण रूपमा सञ्चालनमा ल्याउने योजना रहेको बताए। यसैबीच, मङ्सिरको पहिलो साता प्रधानमन्त्री बालेन शाहबाट सडकखण्डको निरीक्षण हुनसक्ने तयारीसमेत भइरहेको छ। पुलसँगै नदी नियन्त्रणका लागि बाँध निर्माणको कामसमेत जारी छ। नदी नियन्त्रणका लागि आह्वान गरिएको टेन्डरमा १९ वटा कम्पनीले सहभागिता जनाएका छन्, जसको प्राविधिक मूल्याङ्कन आगामी साता सम्पन्न गरी आर्थिक प्रस्ताव खोलिने मन्त्रालयले जनाएको छ।