श्रम तथा व्यवसायजन्य सुरक्षा विभागले श्रमिकहरूलाई अनिवार्य रूपमा चाडपर्व खर्च उपलब्ध गराउन सबै रोजगारदाता तथा प्रतिष्ठानहरूलाई निर्देशन दिएको छ। विभागले बिहीबार विज्ञप्ति जारी गर्दै यस विषयमा ध्यानाकर्षण गराएको हो।
श्रम ऐन, २०७४ को दफा ३७ बमोजिम प्रचलित धर्म, संस्कृति तथा परम्पराअनुसार मनाइने चाडपर्वका लागि प्रत्येक श्रमिकले खाइपाइ आएको एक महिनाको आधारभूत पारिश्रमिक बराबरको रकम प्रत्येक वर्ष चाडपर्व खर्चका रूपमा पाउने कानुनी व्यवस्था छ।
विभागका उप-महानिर्देशक विपिन राजभण्डारीद्वारा जारी विज्ञप्तिमा रोजगारदाता वा प्रतिष्ठानले यो सुविधा उपलब्ध नगराएमा श्रमिक वा कामदारले आफ्नो कार्यक्षेत्र पर्ने श्रम तथा रोजगार कार्यालय वा श्रम तथा व्यवसायजन्य सुरक्षा विभागमा उजुरी तथा निवेदन दिन सक्ने उल्लेख छ।
विभागले चाडपर्वको समयमा श्रमिकको अधिकार सुनिश्चित गर्न यो निर्देशन जारी गरेको हो। श्रमिकको हकहित संरक्षणका लागि विभागले उजुरी प्राप्त भएमा आवश्यक कारबाही गर्ने जनाएको छ।
