रौतहटको मौलापुर नगरपालिका-१ मर्यादपुरस्थित लालबकैया नदीको तटबन्धमा भारी वर्षाले क्षति पुगेको छ। स्थानीय प्रशासन र सुरक्षा निकायले मर्मत कार्य तीव्र पारेका छन्। तटबन्ध कटानले मौलापुर र बौधिमाई नगरपालिकाका विभिन्न वडा डुबानको उच्च जोखिममा छन्।
आइतबार अबेर साँझ मधेस प्रदेशका गृहमन्त्री फकिरा महतोले स्थलगत अनुगमन गरे। उनीसँग नेपाली सेनाका उपरथी भुवन केसी, प्रदेश प्रहरी प्रमुख डीआईजी ओमप्रसाद अधिकारी र सशस्त्र प्रहरी बलका डीआईजी विष्णुप्रसाद भट्टलगायत सहभागी थिए। राष्ट्रिय अनुसन्धानका प्रमुख माधव तिम्लसिना, मौलापुरकी नगर प्रमुख रिनाकुमारी साह र स्थानीय जनप्रतिनिधि पनि अनुगमन टोलीमा थिए।
मन्त्री महतोले तटबन्ध मर्मतका लागि प्रदेश सरकार प्रतिबद्ध रहेको बताए। मर्यादपुरको तटबन्धमा ठूलो क्षति भए मौलापुरका गम्हरिया, बरगिनिया, शीतलपुर, सन्तपुर र पेटभरवा क्षेत्र प्रभावित हुनेछन्। फतुवा पुल नजिकको भगवानपुरको तटबन्ध भत्किए सदरमुकाम गौरसम्म बाढी पुग्ने जोखिम छ।
प्रशासनले जोखिमयुक्त क्षेत्रमा निगरानी बढाएको छ। आवश्यक सुरक्षा जनशक्ति परिचालन गरिएको छ। सेना, प्रहरी र सशस्त्र प्रहरीले राजपुर र मर्यादपुरमा बाँस गाड्ने र बालुवाका बोरा राखेर बहाव नियन्त्रणको प्रयास गरिरहेका छन्।
लगातारको वर्षाले लालबकैया नदीमा जलस्तर बढ्ने सम्भावना छ। प्रशासनले नदी र तटबन्ध आसपासका बासिन्दालाई उच्च सतर्कता अपनाउन आग्रह गरेको छ। जोखिमयुक्त क्षेत्रमा नजान र बाढीको सूचना पाउनासाथ सुरक्षित स्थानमा जान अनुरोध गरिएको छ।
