रौतहट क्षेत्र नम्बर ३ बाट नेकपा एमालेको समानुपातिकतर्फ प्रतिनिधित्व गर्ने प्रदेशसभा सदस्य जैनब खातुनको निधन भएको छ। फतुवा विजयपुर नगरपालिका–५, सन्तपुर दोस्तियाकी खातुनको बुधबार राति वीरगञ्जस्थित नेशनल मेडिकल अस्पतालमा उपचारका क्रममा मृत्यु भएको हो।
बुधबार अचानक रगतमा चिनीको मात्रा बढेपछि उनलाई उपचारका लागि वीरगञ्जस्थित नेशनल मेडिकल अस्पताल लगिएको थियो। उपचारका क्रममा उनको निधन भएको छोरा रौजन मियाँले जानकारी दिए।
खातुनको आकस्मिक निधनको खबरले परिवार, आफन्त, शुभेच्छुक तथा स्थानीयवासी स्तब्ध भएका छन्। खातुनको निधनले स्थानीय राजनीतिक तथा सामाजिक क्षेत्रमा समेत शोकको वातावरण सिर्जना भएको छ। स्थानीयवासीले उनको निधनलाई परिवारसँगै जिल्लाका लागि समेत अपूरणीय क्षति मानेका छन्।
