धनुषाको मिथिला नगरपालिका ११ आपगाछीमा पहिरोले घर पुरिँदा कमला श्रेष्ठको मृत्यु भएको छ। वर्षा र हावाहुरीले पर्सा, बारा, रौतहट, सर्लाही, महोत्तरी, धनुषा र सप्तरीका विभिन्न स्थानमा घर, गोठ तथा भौतिक संरचनामा क्षति पुर्याएको छ।
धनुषामा पहिरोले घर पुरिँदा करिब ३५ वर्षीया कमला श्रेष्ठको मृत्यु भएको छ। परिवारका चार जनालाई सकुशल उद्धार गरिएको छ। प्रहरीका अनुसार उनको शव पोस्टमार्टमका लागि बर्दिबास पठाइएको छ।
पर्साको ठोरी गाउँपालिका ५ आठघरे टोलमा हावाहुरीले कान्छी स्याङवोको टिनको छाना भएको घरमा पूर्ण क्षति पुर्याएको छ। बाराको कलैया उपमहानगरपालिका २ कबहीमा अमिन मियाँको इँटाको गारो र खपटाको छाना भएको घर आंशिक रूपमा क्षतिग्रस्त भएको छ।
रौतहटको राजपुर नगरपालिका ९ वैरियामा घरमा क्षति पुगेको छ। कटहरिया नगरपालिका १ भसेढवा टोलमा लक्ष्मण राय यादवको दुईतले कच्ची घर भत्किएको छ। मौलापुर नगरपालिका ४ पतौरामा भैँसीको गोठ र गरुडा नगरपालिका ८ गम्हरियामा एउटा घर क्षतिग्रस्त भएको छ।
सर्लाहीका विष्णु गाउँपालिका ५ फेन्हारा, मलंगवा नगरपालिका ५ भाडसर, कौडेना गाउँपालिकाका वडा नम्बर ३ र ६ तथा चन्द्रनगर गाउँपालिका १ लगायतका क्षेत्रमा कच्ची घर, गोठ तथा संरचनामा आंशिक वा पूर्ण क्षति पुगेको छ।
महोत्तरीको मनरा शिसवा नगरपालिका १ चौरिया टोलमा चन्द्रकाला मण्डलको बाँस र फुसले बनेको एककोठे घर भासिएको छ। धनुषाका लक्ष्मीनिया गाउँपालिका ३ अगिलेसवा क्षेत्रमा पनि क्षति पुगेको छ।
सप्तरीको तिलाठी कोइलाडी गाउँपालिका ५ स्थित बीओपी बरसाइन परिसर र आसपासका घरमा पानी पसेको छ। हनुमाननगर कंकालिनी नगरपालिकाका वडा नम्बर ७, ११ र १२ अन्तर्गत कोशी बाँधको दक्षिण र उत्तर क्षेत्रका करिब दुई सय घरधुरीका घरआँगनमा पानी पसेको छ।
जिल्ला प्रहरी कार्यालय, सप्तरीबाट टोली परिचालन गरी उद्धार, क्षतिको विवरण संकलन र समन्वयको काम भइरहेको छ।
मधेश प्रदेशका विभिन्न जिल्ला प्रहरी कार्यालयले माइकिङ, गस्ती र सचेतनामूलक कार्यक्रम सञ्चालन गरिरहेका छन्। प्रहरीले नदी किनार, डुबान र पहिरोको जोखिम भएका क्षेत्रमा नजान सर्वसाधारणलाई आग्रह गरेको छ।
मधेश प्रदेश प्रहरी कार्यालयका प्रवक्ता प्रहरी वरिष्ठ उपरीक्षक प्रभु प्रसाद ढकालले उद्धार टोली परिचालन गरी निरन्तर काम भइरहेको बताए। वर्षा जारी रहेकाले जोखिमयुक्त क्षेत्रका नागरिकलाई सतर्क रहन र सुरक्षा सावधानी अपनाउन आग्रह गरिएको छ।
