लघुवित्त पीडित र सरकारबीचको पहिलो चरणको वार्ता सकारात्मक बनेको छ। अर्थ मन्त्रालयको वार्ता टोली र आन्दोलनरत पीडितबीच बिहीबारको छलफल शुक्रबार पुनः बस्ने गरी टुंगिएको छ।
अर्थ मन्त्रालयका अनुसार बिहीबारको वार्ता समाधान उन्मुख थियो। दुवै पक्षबीचका छलफललाई निरन्तरता दिँदै शुक्रबार थप वार्ता गरिनेछ।
लघुवित्त पीडितका माग सम्बोधन गर्न अर्थमन्त्री डा. स्वर्णिम वाग्लेले बिहीबार वार्ता टोली गठन गरेका थिए। अर्थ मन्त्रालयका सहसचिव महेश आचार्य संयोजक रहेको टोलीलाई तत्काल वार्ता गर्न निर्देशन दिइएको थियो।
टोलीमा कानुनका सहसचिव विनोदकुमार भट्टराई, गृहका सहसचिव सुरेश पन्थी र राष्ट्र बैंकका कार्यकारी निर्देशक रामु पौडेल सदस्य छन्। अर्थका उपसचिव बोलराज आचार्य सदस्य सचिव तोकिएका छन्।
लघुवित्तबाट पीडित भएको भन्दै विभिन्न माग राखेर आन्दोलनरत पीडितसँग सरकारले वार्ता प्रक्रिया अघि बढाएको हो।
