नेपाली कांग्रेसको १५औँ महाधिवेशनअन्तर्गत नयाँ कार्यसमितिका लागि उम्मेदवारी दर्ता प्रक्रिया आज दिउँसो १ बजेबाट सुरु भएको छ।
केन्द्रीय निर्वाचन समितिका सदस्य सचिव राजु कटुवालका अनुसार, उम्मेदवारहरूका लागि फारम वितरण भइरहेको छ र निर्धारित समयमा दर्ता प्रक्रिया अघि बढेको हो। यस महाधिवेशनमा देशभरबाट आएका ७ हजार ११४ महाधिवेशन प्रतिनिधिले नयाँ नेतृत्व चयन गर्नेछन्।
कांग्रेसको केन्द्रीय कार्यसमितिको आकार १६७ बाट बढाएर २९७ सदस्यीय बनाइएको छ। संशोधित विधानअनुसार पदाधिकारीको सङ्ख्या १४ बाट बढाएर २६ पुर्याइएको छ। निर्वाचन हुने पदहरूमा सभापति १, वरिष्ठ उपसभापति १, उपसभापति ४ (एक महिला अनिवार्य), महामन्त्री ३ (एक महिला अनिवार्य), सहमहामन्त्री ११ तथा विभिन्न समूह र क्षेत्रबाट केन्द्रीय सदस्यका पदहरू रहेका छन्।
उम्मेदवारी दर्ता आज अपराह्न ४:०० बजेसम्म चल्नेछ। सभापति पदमा उम्मेदवारी दिन ४० हजार रुपैयाँ, उपसभापति र महामन्त्रीका लागि ३० हजार रुपैयाँ, र सहमहामन्त्रीका लागि २० हजार रुपैयाँ शुल्क निर्धारण गरिएको छ।
उम्मेदवारहरूको प्रथम नामावली प्रकाशन आज दिउँसो ४:३० बजे हुनेछ। उम्मेदवारीमाथि दाबी विरोध आज दिउँसो ४:३० देखि साँझ ५:३० बजेसम्म र छानबिन साँझ ५:३० देखि ६:३० बजेसम्म गरी बेलुका ७ बजे उम्मेदवारको दोस्रो नामावली प्रकाशन गरिनेछ।
असोज २१ गते बिहान ९ बजेसम्म उम्मेदवारको नामावली फिर्ता लिने र बिहान १० बजे उम्मेदवारको अन्तिम नामावली प्रकाशन गर्ने तालिका छ। मतदान असोज २२ गते बिहान ७:३० देखि साँझ ५ बजेसम्म राष्ट्रिय सभागृह, खुलामञ्च र प्रज्ञा भवनमा हुनेछ। मतदान सम्पन्न भएलगत्तै मतगणना सुरु गरिने निर्वाचन समितिले जनाएको छ।
नयाँ विधानअनुसार मधेशीबाट पाँच महिलासहित १३ जना केन्द्रीय सदस्य रहनेछन्। मधेश प्रदेशका प्रतिनिधिहरूका लागि खुलामञ्चलाई मतदान स्थल तोकिएको छ।
प्रमुख पदहरूमा कुन-कुन उम्मेदवारले मनोनयन दर्ता गरेका छन् भन्ने विस्तृत जानकारी अझै सार्वजनिक भइसकेको छैन। सर्वसम्मत नेतृत्व चयनका लागि पहल भए पनि यसको सम्भावना अझै अनिश्चित छ।
