नेपाल प्रिमियर लिग (एनपीएल) २०२६ अन्तर्गत आज दिउँसो पोखरा एभेन्जर्स र कर्णाली याक्सबीच कीर्तिपुरको टीयू अन्तर्राष्ट्रिय क्रिकेट मैदानमा खेल हुँदैछ। यो सिजनमा खेलेका चारवटै खेलमा हार बेहोरेको पोखरा एभेन्जर्सलाई आज पहिलो जितको दबाब छ।
कप्तान कुशल भुर्तेलको नेतृत्वमा रहेको पोखरा एभेन्जर्स अंक तालिकाको पुछार, आठौँ स्थानमा शून्य अंकसहित छ। टोलीले सुदूरपश्चिम रोयल्स, जनकपुर बोल्ट्स, लुम्बिनी लायन्स र चितवन राइनोजसँगका अघिल्ला खेलहरूमा हार भोगेको थियो।
उता, कप्तान सोमपाल कामीको कर्णाली याक्स भने चार खेलमध्ये दुईमा जित र दुईमा हारका साथ ४ अंक जोडेर अंक तालिकाको छैटौँ स्थानमा छ। याक्सले जनकपुर बोल्ट्स र विराटनगर किंग्सविरुद्ध जित निकालेको थियो भने काठमाडौं गुर्खाज र सुदूरपश्चिम रोयल्ससँग पराजित भएको थियो।
एभेन्जर्सको प्रतिष्ठा र याक्सको अंक सुधार
लगातारको हारले पोखरा एभेन्जर्सको प्लेअफ यात्रा लगभग समाप्त भइसकेको छ। तर, आजको खेल टोलीको मनोबल र प्रतिष्ठाका लागि महत्वपूर्ण छ। एभेन्जर्सले बाँकी खेलहरूमा सम्मानजनक प्रदर्शन गर्ने लक्ष्य राखेको देखिन्छ।
कर्णाली याक्स आजको खेल जितेर अंक तालिकामा आफ्नो स्थान सुधार गर्ने दाउमा छ। प्रतियोगितामा थप प्रतिस्पर्धात्मक बन्नका लागि याक्सलाई पनि जित्नैपर्ने दबाब छ।
