नेपाल राष्ट्र बैंकले प्रभु बैंकका तत्कालीन प्रमुख कार्यकारी अधिकृत (सिइओ) अशोक शेरचनलाई ५ लाख रुपैयाँ नगद जरिवाना गरेको छ। केन्द्रीय बैंकका निर्देशन उल्लंघन गरेको निष्कर्षमा राष्ट्र बैंकले यो कारबाही गरेको हो।
प्रभु बैंकले विगतका स्थलगत निरीक्षण प्रतिवेदनमा कर्जासम्बन्धी निर्देशन कार्यान्वयन नगरेको पाइएको थियो। पछिल्लो २०८२ को प्रतिवेदनमा समेत अघिल्लो निरीक्षणका कैफियत सुधार गरिएका थिएनन्।
बैंकले एकीकृत निर्देशनअनुसार कर्जा वर्गीकरण नगरी पर्याप्त नोक्सानी व्यवस्था कायम नगरेको राष्ट्र बैंकले जनाएको छ।
राष्ट्र बैंकमा पेस गरिएको कर्जा विवरण बैंकको कोर बैंकिङ प्रणालीको विवरणसँग नमिलेको निरीक्षणमा भेटिएको थियो।
नियामकीय निकायलाई फरक विवरण बुझाउनु गम्भीर उल्लंघन ठहर गर्दै तत्कालीन नेतृत्वकर्ता शेरचनलाई व्यक्तिगत जरिवाना गरिएको हो।
राष्ट्र बैंकले सञ्चालक समितिलाई कमजोरी सुधार गर्न निर्देशन दिएको थियो। पर्याप्त सुधार नभएपछि तत्कालीन सिइओमाथि कारबाही भएको हो।
यो कारबाही आर्थिक वर्ष २०८२–८३ को चौथो त्रैमासिकमा बैंक तथा वित्तीय संस्थामाथिको कारबाहीअन्तर्गत सार्वजनिक गरिएको हो।
