रौतहटका मध्य तथा दक्षिणी भेगका सयौँ बिघा धानखेत लालबकैया र झाझ खोलाको बाढीले जलमग्न भएका छन्। लगातार दुई दिन परेको साउने झरीले खोला उर्लिएपछि किसानको मेहनत एकै रातमा डुबेको हो।
बोरिङमार्फत सिँचाइ गरी ठूलो लगानीमा रोपिएको धानबाली बाढीले डुबाएपछि किसान चिन्तित बनेका छन्। दुर्गा भगवती गाउँपालिकाका बडहर्वा, पचरुखी, मत्सरी, पिपरा र भलोहियासहित पाँचै वडाका खेत डुबानमा परेका छन्। यमुनामाई गाउँपालिकाका चार वडा, माधवनारायण र गरुडा नगरपालिकाका सयौँ बिघा धान खेतमा पनि बाढी पसेको छ।
यमुनामाई गाउँपालिकाको राजपुरतुलसी, जिङ्गडवा, झुन्खुन्वाका किसानको धानबालीमा लालबकैया खोलाको बाढीले ठूलो क्षति पुर्याएको छ। ‘रोपाइँ गरेको खेतमै बाढीको पानी जमेकाले यस वर्षको उत्पादनमा गम्भीर असर पर्नेछ,’ राजपुरतुलसीका राजदेव मुखियाले बताए।
बोरिङबाट सिँचाइ गरी समयमै रोपाइँ सकिएका धान खेत बाढीको पानीमुनि छन्। बाढी लामो समयसम्म नघटे धानका बोट कुहिने, उत्पादन घट्ने र लाखौँ रुपैयाँको लगानी डुब्ने जोखिम बढेको छ।
प्रमुख जिल्ला अधिकारी दिनेश सागर भुसालले झाझ खोलाको बाढीले सयौँ बिघा कृषि भूमि डुबानमा परेको पुष्टि गरे। प्रभावित क्षेत्रमा प्रहरी र प्रशासनले निगरानी गरिरहेको छ। सम्भावित क्षति रोक्न उद्धार तथा विपद् व्यवस्थापन टोलीलाई २४ घण्टा तयारी अवस्थामा राखिएको उनले बताए।
